नवी दिल्ली: अॅक्सिओम-४ मोहिमेतून यशस्वीरित्या परतल्यानंतर ग्रुप कॅप्टन शुभांशू शुक्लाच्या कुटुंबामध्ये आनंदाची लाट पसरली आहे. "मोहीम यशस्वीरीत्या पूर्ण होऊन मुलगा सुखरूप परतला, आता कोणतीही भीती नाही" असे भावोद्गार शुभांशु शुक्ला यांच्या आईने काढले. तर त्यांच्या वडिलांनीदेखील आनंद व्यक्त करत सर्वांचे आभार मानले आहेत. पंतप्रधान मोदींनी देखील शुभांशु शुक्ला यांचे अभिनंदन करत त्यांना अब्जावधी स्वप्नांचा प्रेरणास्थान म्हटले.
१८ दिवस आंतरराष्ट्रीय अंतराळ स्थानकावर राहिल्यानंतर भारतीय अंतराळवीर शुभांशू शुक्ला आज मंगळवारी पृथ्वीवर सुरक्षितपणे परतले. त्यांच्या या ऐतिहासिक मोहिमेनंतर संपूर्ण देशात उत्साहाचे वातावरण आहे. या खास प्रसंगी शुभांशूची आई आशा शुक्ला यांनी आनंदाश्रूसोबत आपला आनंद व्यक्त केला.
"मुलगा खूप मोठे मिशन पूर्ण करून परतला आहे. तो कसा गेला आणि कसा परत आला हे पाहणेच खूप मोठी गोष्ट होती. मी सतत देवाला प्रार्थना करत होती की लँडिंग सुरक्षित व्हावे. आता सर्व भीती संपली आहे आणि मी पूर्णपणे निश्चिंत झाले आहे" अशा भावना त्यांनी व्यक्त केल्या,
शुभांशूचे वडील शंभू दयाळ शुक्ला यांनीही आनंद व्यक्त करताना सांगितले की "या मोहिमेसाठी आमच्या मुलाला प्रोत्साहन आणि भरभरून आशीर्वाद देणाऱ्या सर्वांचे आम्ही आभार मानतो." शुभांशूच्या कुटुंबाने केक कापत त्यांच्या परतीचा आनंद साजरा केला.
पंतप्रधान मोदींनी केले शुभांशू शुक्ला यांचे अभिनंदन
पंतप्रधान नरेंद्र मोदींनी देखील या खास प्रसंगी अंतराळवीर शुभांशू शुक्ला यांचे अभिनंदन केले. "आंतरराष्ट्रीय अंतराळ स्थानकाला भेट देणारे भारताचे पहिले अंतराळवीर म्हणून शुभांशू शुक्ला यांनी धैर्य आणि समर्पण भावनेने अब्जावधी स्वप्नांना प्रेरणा दिली आहे. आपल्या स्वतःच्या मानवी अंतराळ उड्डाण मोहिमेच्या दिशेने हा आणखी एक मैलाचा दगड आहे - गगनयान, असे म्हणत पंतप्रधान नरेंद्र मोदी यांनी X वर एक पोस्ट करत शुभांशूचे स्वागत केले.