ठाणे : ठाणे येथील कॅडबरी चौकाच्या परिसरात एका डम्परने दुचाकीला जोरदार धडक दिली. या अपघातात दुचाकीवरील पोलिस कर्मचारी गंभीर जखमी झाला. त्याला खासगी रुग्णालयात उपचारासाठी दाखल करण्यात आले. पण, तिथे उपचारादरम्यान त्याचा मृत्यु झाला. या घटनेमुळे ठाणे पोलिस दलात हळहळ व्यक्त होत आहे. याप्रकरणी राबोडी पोलिसांनी गुन्हा दाखल करून डम्परचालकाला अटक केली आहे.
राजकुमार चौधरी असे अटक करण्यात आलेल्या डम्पर चालकाचे नाव आहे. सुरेश भालेराव असे अपघातात मृत पावलेल्या पोलिस कर्मचाऱ्याचे नाव आहे. ते ठाण्यातील वर्तकनगर येथील शिवाईनगर भागात राहत होते. ते ठाणे पोलिस दलात पोलिस नाईक पदावर कार्यरत होते. त्यांची नेमणुक ठाणे पोलिस मुख्यालयात होती. सुरेश भालेराव हे शनिवारी सकाळी १०.३० वाजता कामावर जाण्यासाठी निघाले. दुचाकीने ते कामावर जात होते. कॅडबरी चौकातील ठाण्याहून नाशिककडे जाणाऱ्या वाहिनीवरून त्यांची दुचाकी जात होती. त्याचवेळी एक भरधाव डम्पर आला आणि त्याने त्यांच्या दुचाकीला धडक दिली. या अपघातात ते दुचाकीवरून खाली पडले आणि त्यात ते गंभीर जखमी झाले. त्यांचा उपचारादरम्यान मृत्यु झाला. याप्रकरणी राबोडी पोलीस ठाण्यात गुन्हा दाखल करण्यात आला असून पोलिसांनी डम्परचालक राजकुमार चौधरी याला अटक केली आहे.