हमासच्या नौदल कमांडरसह तीन सैनिक ठार
इस्रायल सैन्याने (आयडीएफ) पुन्हा गाझा येथे हवाई हल्ला करत हमासच्या नौदल दलाचे कमांडर रमझी रमझान अब्द अली सालेह यांना ठार केले आहे. तसेच या हल्ल्यात हमासच्या तीन सैनिकांचा देखील मृत्यू झाला आहे. इस्रायली सैन्याने ही कारवाई गाझामध्ये सक्रिय दहशतवाद्यांच्या क्षमता कमकुवत करण्याच्या दिशेने उचलेले एक महत्त्वाचे पाऊल असल्याचे म्हंटले आहे.
इस्रायली सैन्याच्या मते, सालेह हा हमासमधील एक महत्त्वाचा धोरणात्मक व्यक्ती होता आणि अलिकडच्या आठवड्यात तो गाझामध्ये तैनात असलेल्या इस्रायली सैनिकांविरुद्ध समुद्री हल्ल्यांचे नियोजन आणि अंमलबजावणी करण्यात सहभागी होता. आयडीएफने या हल्ल्यात आणखी दोन हमास सैनिकांच्या मृत्यूची पुष्टी केली आहे. यामध्ये हमासच्या मोर्टार शेल युनिटचे उपप्रमुख असल्याचे सांगितले जाणारे हिशाम आयमान अतिया मन्सूर यांचा समावेश आहे. त्याच वेळी, हमासच्या त्याच मोर्टार युनिटशी संबंधित नसीम मोहम्मद सुलेमान अबू सबाह देखील या हल्ल्यात मारला गेला आहे.
गाझा सिटी कॅफेवर हल्ला
द टाईम्स ऑफ इस्रायलनुसार, आयडीएफने पुष्टी केली की हा हल्ला गाझा शहरातील एका कॅफेवर करण्यात आला, ज्यामध्ये हमासशी संबंधित स्थानिक अधिकाऱ्यांच्या मते २४ लोक मारले गेले. सैन्याच्या मते, या कारवाईत हमासचे इतर अनेक दहशतवादी देखील मारले गेले आहेत. हल्ल्याच्या वेळी सालेह एक बैठक घेत होता. हा अचूक हल्ला इस्रायली हवाई दलाच्या लढाऊ विमानाने केला आहे, जे नौदल, लष्करी गुप्तचर संचालनालय आणि शिन बेटकडून मिळालेल्या गुप्त माहितीच्या आधारे करण्यात आला.
इस्रायली सैन्याने असेही म्हटले आहे की नागरिकांना इजा होऊ नये म्हणून अनेक खबरदारी घेण्यात आली होती, ज्यामध्ये अचूक शस्त्रांचा वापर, हवाई देखरेख आणि अतिरिक्त गुप्त माहितीचा समावेश होता.