केरळच्या शाळांमध्ये झुंबा सक्ती

कोझिकोड : अमली पदार्थविरोधी मोहिमेचा भाग म्हणून शाळांमध्ये झुंबा नृत्याचे शिक्षण बंधनकारक करण्याचा निर्णय केरळ सरकारने घेतला आहे. काँग्रेसचा या निर्णयाला विरोध आहे. विशिष्ट नृत्य प्रकार शिकण्याची सक्ती विद्यार्थ्यांवर करणे योग्य नाही, अशी भूमिका काँग्रेसने घेतली आहे. तर विरोध झाला तरी निर्णय बदलणार नाही, असे स्पष्ट संकेत केरळचे मुख्यमंत्री आणि कम्युनिस्ट पार्टी ऑफ इंडियाचे नेते पिनरायी विजयन यांनी दिले आहेत.

शिक्षणमंत्री व्ही. शिवनकुट्टी यांनी झुंबा सक्ती या विषयावर प्रसारमाध्यमांना प्रतिक्रिया दिली आहे. काँग्रेस निरर्थक वाद निर्माण करत असल्याचे ते म्हणाले. विद्यार्थ्यांचे नुकसान होईल, असा कोणताही निर्णय केरळ सरकारने घेतलेला नाही आणि घेणार नाही; असे ते म्हणाले.

झुंबा शाळेत शिकवण्यामागे केरळ सरकारची स्पष्ट अशी एक भूमिका आहे. ती समजून घेण्याच्या उद्देशाने होणाऱ्या चर्चेचे स्वागत आहे. पण विरोधासाठी होणाऱ्या विरोधाला डावलले जाईल; असे शिक्षणमंत्री व्ही. शिवनकुट्टी यांनी सांगितले. झुंबा नृत्य केल्यामुळे मुलांमधील उत्साह वाढेल. मुलं फिट राहण्यास मदत होईल; असेही केरळचे शिक्षणमंत्री व्ही. शिवनकुट्टी म्हणाले. काही मुस्लिम संघटना शाळेत झुंबा शिकवण्याला विरोध करत आहेत. त्यांच्याशी चर्चा करणार असल्याचे केरळ सरकारने सांगितले.