योगदिनाच्या निमित्ताने विश्वविक्रम करण्याकरिता विशाखापट्टणम समुद्रकिनाऱ्यावर मोठी तयारी करण्यात आली आहे. एकाच ठिकाणी विक्रमी पाच लाख लोक योग करू शकतील यासाठी आवश्यक अशी व्यवस्था करण्यात आली आहे. पंतप्रधान मोदी, मुख्यमंत्री नायडू आणि उपमुख्यमंत्री पवन कल्याण हे देखील या कार्यक्रमात सहभागी होतील.
योगादिनाच्या विश्वविक्रमासाठी जय्यत तयारी
विशाखापट्टणम येथील आरके बीच ते भिमिली पर्यंत २६ किमी रस्त्यावर बॅरिकेड्स, मॅट्स, इलेक्ट्रिक लाईट्स, एलईडी स्क्रीन आणि प्रशिक्षकांसाठी प्लॅटफॉर्म तयार करण्यात आले आहेत. पाऊस पडल्यास योगदिनाचा कार्यक्रम बंद पडू नये, याकरिता आंध्र विद्यापीठात पर्यायी व्यवस्था करण्यात आलेली आहे. आंतरराष्ट्रीय योग दिनानिमित्त, चंद्राबाबू नायडू सरकारच्या वतीनं राज्य स्तरावर आयोजित विविध वयोगटातील स्पर्धांमधील १७९ विजेत्यांची निवड करण्यात आली आहे. ते सर्व आरके बीचवरील योग महोत्सवात विविध आसने करून सादरीकरण करणार आहेत.
असा आहे योगदिनाचा कार्यक्रम
पंतप्रधान मोदी शुक्रवारी संध्याकाळी ६.४० वाजता विशेष विमानानं विशाखापट्टणमला पोहोचणार आहेत. स्वागत समारंभानंतर ते संध्याकाळी ६.४५ वाजता ईस्टर्न नेव्हल कमांड ऑफिसर्स मेस गेस्ट हाऊसमध्ये जाणार आहेत. पंतप्रधान तिथे रात्रीचा मुक्काम करणार आहेत. शनिवारी (२१ जून) पंतप्रधान सकाळी ६ वाजता रस्तेमार्गे आरके बीचला रवाना होऊन सायंकाळी ६.२५ वाजता पोहोचतील. योग समारंभानंतर ते संध्याकाळी ७.५० वाजता निघतील. पंतप्रधान दुसऱ्या दिवशी सकाळी ११.२५ वाजता हेलिकॉप्टरने परत येतील. सकाळी ११.४५ वाजता आयएनएस देगा येथे पोहोचतील. पंतप्रधान मोदी सकाळी ११.५० वाजता दिल्लीला रवाना होतील.२१ तारखेला सकाळी ६.२५ वाजता योग-२०२५ कार्यक्रमाचे उद्घाटन होईल. पंतप्रधान मोदी १५ मिनिटे भाषण करतील. सकाळी ७ वाजता आसन सुरू होतील आणि संध्याकाळी ७.४५ वाजेपर्यंत चालतील.
२०१४ मध्ये संयुक्त राष्ट्रांच्या महासभेत पंतप्रधान नरेंद्र मोदी यांनी २१ जून हा आंतरराष्ट्रीय योग दिन म्हणून साजरा करण्याचा प्रस्ताव ठेवला होता. त्यानुसार संयुक्त राष्ट्रानं २१ जून हा आंतरराष्ट्रीय योग दिन साजरा करण्याला मान्यता दिली आहे.