मुंबई : 'मेट्रो १' च्या घाटकोपर-अंधेरी-वर्सोवा मेट्रो मार्गिकेवरील गाड्यांच्या फेऱ्यांमध्ये वाढ करण्यात आली. 'मेट्रो १' वर सोमवारपासून प्रतिदिन आठ फेऱ्या वाढविण्यात आल्या असून आता एकूण फेऱ्यांची संख्या ४४४ वरून ४५२ झाली आहे. मेट्रो फेऱ्यांमध्ये वाढ झाल्याने प्रवाशांना दिलासा मिळणार आहे.
२०१४ मध्ये 'घाटकोपर-वर्सोवा मेट्रो १' मार्गिका वाहतूक सेवेत दाखल झाली. आता या मार्गिकेला चांगला प्रतिसाद मिळत असून 'मेट्रो १' मधून प्रतिदिन पाच लाखांहून अधिक प्रवासी प्रवास करत आहेत. गाड्यांच्या डब्यांच्या संख्येत मात्र वाढ झाली नाही. त्यामुळे कार्यालयीन वेळेत प्रवाशांची प्रचंड गर्दी होते. 'मेट्रो १' मार्गिकेवर दर ३ मिनिटे आणि २५ सेकंदाने एक गाडी सुटत होती. आता मात्र दर ३ मिनिटे २० सेकेंदाने गाडी धावणार आहे. एकूणच गाड्यांची संख्या वाढल्याने आता प्रवाशांना दिलासा मिळेल, अशी अपेक्षा व्यक्त होत आहे.
