सोलापूर: अकलूज येथील सयाजीराजे वॉटर पार्कमधील फिरत्या पाळण्यामध्ये भीषण अपघाताची घटना घडली. या पार्कमधील एक पाळणा अचानक निसटून पडल्याने, त्यामधील तिघांना जबरदस्त मार बसल्याची प्राथमिक माहिती समोर आली होती, मात्र त्यांपैकी एकाचा उपचारादरम्यान दुर्दैवी मृत्यू झाला असल्याचे सूत्रांकडून कळते.
या भीषण दुर्घटनेत भिगवण येथील तुषार धुमाळ नावाचे व्यावसायिक अत्यंत गंभीर जखमी झाले होते. धुमाळ यांना तात्काळ अकलूज येथील रुग्णालयात उपचारासाठी हलविण्यात आले होते. मात्र, उपचारापूर्वीच त्यांचे निधन झाल्याची माहिती आहे. दरम्यान, अपघातातील इतर दोन जखमींवर रुग्णालयात उपचार सुरू आहेत.
सोलापूर येथील प्रसिद्ध वॉटर पार्क
अकलूज येथील सयाजीराजे वॉटर पार्क हे सोलापूर जिल्ह्यातील प्रसिद्ध पर्यटनस्थळ आणि वॉटर पार्क आहे. सोलापूरसह जवळील इतर जिल्ह्यातून याठिकाणी सुट्टीची मज्जा लुटण्यासाठी हजारो पर्यटक येतात. जयसिंह मोहिते पाटील यांच्या मालकीचे हे वॉटर पार्क असून दुर्दैवाने आज येथील फिरत्या पाळण्याच्या अपघातात एकाचा मृत्यू झाला तर दोघा जखमींवर उपचार सुरू आहेत. त्यापैकी, एकाच्या मानेला फ्रॅक्चर झाल्याची माहिती आहे. तर दुसऱ्याला किरकोळ दुखापत झाली असल्यामुळे त्याची प्रकृती स्थिर आहे.