कुंडमळा : मावळ तालुक्यातील कुंडमळा या प्रसिद्ध पर्यटनस्थळी रविवारी झालेल्या दुर्घटनेला प्रशासन जबाबदार असल्याचं बोललं जातयं. ३० वर्षांपूर्वीचा पूल जीर्ण झाला होता. या ठिकाणी नवीन पूल बांधण्याची स्थानिकांची अनेक वर्षांपासूनची मागणी होती. मंजुरी मिळाल्यानंतर काम सुरू करण्याबाबतचा आदेश काढण्यात वर्ष निघून गेले. आसपासच्या गावांतील ग्रामस्थांचे दळणवळण, पर्यटकांच्यादृष्टीनं आकर्षक असणारे पर्यटनस्थळ यामुळं याठिकाणी पुलाचे काम तातडीनं होणं अपेक्षित होतं. मात्र लालफितीच्या कारभारामुळं पुलाचं काम रखडल्यानं या दुर्घटनेला प्रशासनच जबाबदार असल्याचा सूर व्यक्त होतोय.
३० वर्षांपूर्वी तत्कालीन आमदार रूपलेखा ढोरे, तत्कालीन खासदार स्व. अण्णा जोशी, त्यानंतरच्या काळात तत्कालीन आमदार स्व. दिगंबर भेगडे यांच्या प्रयत्नातून या पुलाचं काम झालं होतं. हा पादचारी स्वरूपाचा लोखंडी पूल असताना यावरून दुचाकीची ये-जा सुरू होती. इंदुरी, कुंडमळा, सांगुर्डी, शेलारवाडी, देहूरोड या भागातील नागरिकांच्या दृष्टीनं ये जा करण्यासाठी हा मार्ग सोयीचा होता. त्यामुळं इथं नवा पूल व्हावा, अशी अनेक वर्षांपासूनची मागणी होती. यासंदर्भात आमदार सुनील शेळके यांनी कुंडमळा येथे नवीन पुलासाठी निधी मिळण्यापासून ते वर्क ऑर्डर निघेपर्यंत सतत पाठपुरावा केला.
कुंडमळा इथल्या नवीन पुलासाठी कधीपासून पाठपुरावा सुरू होता
- ३ फेब्रुवारी २०२२ : उपमुख्यमंत्री अजित पवार यांच्याकडे निधीची मागणी केली.
- २ डिसेंबर २०२२ : सार्वजनिक बांधकाम मंत्री रवींद्र चव्हाण यांच्याकडे निधी मागितला.
- ११ जुलै २०२४ : अर्थसंकल्पात निधीची तरतूद करण्यात आली.
- १९ सप्टेंबर २०२४ : तांत्रिक मान्यता मिळाली.
- १० जून २०२५ : कामाची वर्क ऑर्डर निघाली.
दुर्दैवं म्हणजे काम सुरू करण्याचा आदेश निघाल्यानंतर पाच दिवसांनी कुंडमळा इथं ही दुर्घटना घडली. आतापर्यंत चार मृत्यूमुखी पडलेत. ५० पेक्षा अधिक पर्यटक जखमी आहेत. यात अनेकजण वाहून गेल्यानं मृत्यूचा आकडा वाढण्याची भीती वर्तवली जातेय. तळेगाव दाभाडे पोलिस या भीषण दुर्घटनेचा कसून तपास करताहेत. तसेच जिल्हा प्रशासनानं चौकशी करण्यासाठी सहा सदस्यांची समिती स्थापन केलीय. ही समिती जिल्हा प्रशासनाला अहवाल सादर करणार आहे. यासाठी १५ दिवसाची मुदत दिलेली आहे. मात्र या ठिकाणी झालेल्या पर्यटकांच्या गर्दीला आणि हुल्लडबाजीला जबाबदार कोण ? असा प्रश्न उपस्थित केला जातोय.
हा पूल कमकुवत असल्यानं व येथील रांजणखळगे धोकादायक असल्यानं याठिकाणी पर्यटकांना येण्यास बंदी असणं अपेक्षित होतं. तसंच, संबंधित पूल हा कमकुवत असल्यानं या पुलावरून ये-जा करू नये, असा फलकही याठिकाणी लावण्यात आलेला होता. असे असतानाही इतक्या मोठ्या संख्येनं पर्यटक येतात, पुलावरच हुल्लडबाजी करतात. वास्तविक या पुलाच्या एका बाजूला एमआयडीसी पोलिसांची हद्द तर दुसरीकडं तळेगाव दाभाडे पोलिसांची हद्द आहे. तसेच, डिफेन्सचाही भाग येतो. मग दिवसेंदिवस अशा धोकादायक ठिकाणी वाढणाऱ्या पर्यटकांच्या गर्दीला किंवा स्थानिकांनी दिलेल्या माहितीनुसार, इथं रात्रंदिवस चालणाऱ्या हुल्लडबाजीला जबाबदार कोण? असा प्रश्न उपस्थित केला जातोय.