अहमदाबाद : गुजरातच्या राजकीय इतिहासात महत्त्वाची भूमिका बजावलेले माजी मुख्यमंत्री विजय रुपाणी यांचे एअर इंडियाच्या विमान अपघातात निधन झाल्याची दु:खद घटना गुरुवारी घडली. अहमदाबाद विमानतळावरून लंडनकडे निघालेल्या फ्लाइट AI-171 या बोईंग ७८७-७ ड्रीमलाइनरने दुपारी १.३० वाजता टेकऑफ केल्यानंतर अवघ्या काही क्षणांतच मेघानीनगर भागात कोसळले.
या विमानात एकूण २४२ प्रवासी होते, त्यामध्ये २३० प्रवासी आणि १२ क्रू मेंबर्स होते. दुसऱ्या रांगेत बसलेले विजय रुपाणी या दुर्घटनेत मृत्युमुखी पडले, अशी माहिती खासदार परिमल नाथवानी यांनी दिली. त्यांच्या मृत्यूने संपूर्ण राज्यात शोककळा पसरली आहे.
अहमदाबाद : गुजरातच्या अहमदाबादमध्ये एअर इंडियाच्या बोईंग 787-8 विमानाला मोठा अपघात झाल्यानं संपूर्ण शहरात खळबळ उडाली आहे. हे विमान टेकऑफदरम्यान कोसळून ...
विजय रुपाणी आपल्या पत्नी अंजली यांना लंडनहून परत आणण्यासाठी प्रवास करत होते. मात्र, नियतीने वेगळाच खेळ खेळला. त्यांच्या पत्नी लंडनमध्ये असून या दु:खद बातमीने त्यांच्यावर आभाळ कोसळल्यासारखी परिस्थिती निर्माण झाली आहे.
अपघाताचे कारण इंजिन बिघाड किंवा टेकऑफदरम्यान मागच्या भागाने झाडाला धडक झाल्याने अपघात झाल्याची शक्यता व्यक्त केली जात आहे.
विजय रुपाणी यांचा जन्म म्यानमारच्या यांगॉन येथे २ ऑगस्ट १९५६ रोजी झाला. लहानपणीच त्यांचे कुटुंब राजकोटमध्ये स्थलांतरित झाले. एबीव्हीपी पासून संघ परिवाराशी त्यांचा संबंध सुरू झाला आणि पुढे त्यांनी भारतीय जनता पक्षात विविध जबाबदाऱ्या सांभाळत २०१६ ते २०२१ पर्यंत गुजरातचे मुख्यमंत्री म्हणून काम पाहिले.
गुजरातने केवळ एक राजकारणी नाही, तर एक प्रामाणिक, संयमी आणि कर्तव्यनिष्ठ नेतृत्व गमावले आहे.
