मुंबई : आमिर खानचा बहुप्रतिक्षित चित्रपट ‘सितारे जमीन पर’ लवकरच प्रेक्षकांच्या भेटीस येतोय. नुकतंच या चित्रपटाचा टायटल ट्रॅक प्रदर्शित करण्यात आला असून, त्यानंतर प्रेक्षकांच्या उत्सुकतेला अजूनच उधाण आलं आहे.
या चित्रपटात आमिर खान एका बास्केटबॉल कोचच्या भूमिकेत झळकणार असून, गाण्यात त्याचा आणि लहान मुलांमधील भावनिक नातं सुंदररीत्या दाखवलं आहे. विशेष म्हणजे या गाण्यात अभिनेत्री जेनेलिया देशमुखसोबत आमिरची नव्या अंगानं साकारलेली केमिस्ट्री प्रेक्षकांच्या लक्षात राहणारी ठरते.
चित्रपटात १० नवोदित बालकलाकारांनी काम केलं असून, त्यांच्या सादरीकरणामुळे चित्रपटाला एक ताजेपणाचा स्पर्श मिळाला आहे. आर. एस. प्रसन्ना दिग्दर्शित या चित्रपटाला शंकर-एहसान-लॉय यांचं हृदयस्पर्शी संगीत आणि अमिताभ भट्टाचार्य यांची भावपूर्ण गीतं लाभली आहेत.
‘तारे जमीन पर’ या सुपरहिट चित्रपटाचा हा सामाजिक संदेश असलेला सिक्वल प्रेक्षकांसमोर २० जून २०२५ रोजी चित्रपटगृहात येणार आहे. आता या गाण्यानं चित्रपटाच्या प्रतीक्षेचं वातावरण आणखीच वाढवले आहे.