आमदार मंदा म्हात्रे यांच्या अधिकाऱ्यांना सूचना
नवी मुंबई :नवी मुंबईमधील बेलापूर विभागातील सेक्टर १२ येथे असलेले सिडको निर्मित पावसाळी जलउदंचन केंद्र (पंप हाऊस) हे गेले ३५ ते ४० वर्षे जुने असून त्याचे भूमिपूजन होऊन देखील वर्ष झाले तरी काम पूर्ण न झाल्याने अवकाळी पावसामुळे नवी मुंबईत व विषेशत: सीबीडी बेलापूर विभागात सेक्टर ४,५,११ येथे मोठ्या प्रमाणात पाणी साचल्याने जनजीवन विस्कळीत झाले होते. तसेच काल सुद्धा अवकाळी पावसाने पुन्हा व्यापाऱ्यांमध्ये भीतीचे वातावरण निर्माण झाले होते. त्याच अनुषंगाने बेलापूर विधानसभा क्षेत्राच्या आ.
म्हात्रे यांनी भाजपा जिल्हाध्यक्ष डॉ. राजेश पाटील व सीबीडी येथील व्यापारी तसेच महापालिका शहर अभियंता शिरीष आरदवाड व इतर संबधित अधिकाऱ्यांसमवेत बेलापूर येथील होल्डींग पाँडचा पाहणी दौरा केला. पाहणी दौऱ्यासंदर्भात आ. म्हात्रे यांनी सदर होल्डींग पाँडचे काम लवकरात लवकर केले नाही तर संबंधित ठेकेदाराला काळ्या यादीत टाकावे, असे आदेश उपस्थित महापालिका अधिकाऱ्यांना दिले. त्याचबरोबर अवकाळी पावसाने जी परीस्थिती महाराष्ट्रभर उद्भवली तशी नवी मुंबईत येवू नये याकरिता प्रथम खबरदारी घ्यावी असे आदेश पालिकेतील संबंधित अधिकाऱ्यांना दिले आहेत.त्या पुढे म्हणाल्या की, गेल्या आठवड्यात अवकाळी पाऊस झाल्याने संपूर्ण महाराष्ट्र पाण्याखाली गेले होते.
परंतु काही समाजकंटकांनी बेलापूर विभाग पाण्याखाली गेला असल्याची बातमी प्रसारित केली. त्याचबरोबर होल्डींग पाँडचे काम प्रगतीपथावर सुरु आहे. परंतु होल्डींग पाँडच्या परिसरात जे अतिक्रमण केले गेले आहे. त्या अतिक्रमणावर येत्या ४ दिवसात कारवाई करण्याचे निर्देश संबंधित अधिकाऱ्यांना दिले.