दहिसर स्थानकावर पहिला प्रकल्प कार्यान्वित

मुंबई : ई-वाहन चालकांसाठी आनंदची बातमी आहे. फ्लीट ऑपरेटर, डिलिव्हरी एजंट्स आणि सर्वसामान्य प्रवाशांना मोठा दिलासा मिळणार आहे. महामुंबई मेट्रो ऑपरेशन कॉर्पोरेशन लिमिटेड (एमएमएमओसीएल) ने मेट्रो आणि मोनोरेल स्थानकांवर इलेक्ट्रिक वाहनांच्या बॅटरी स्वॅपिंग स्टेशनची सुविधा सुरू करण्यात येणार असून, दहिसर पूर्व मेट्रो स्थानकावर या उपक्रमाचा पहिला प्रकल्प नुकताच कार्यान्वित करण्यात आला आहे. हा उपक्रम MMMOCLने होंडा पॉवर पॅक एनर्जी इंडिया या जपानी कंपनीसोबत भागीदारीत सुरू केला आहे. या सुविधेमुळे ई-वाहनचालक केवळ दोन मिनिटांत चार्ज झालेली बॅटरी घेऊन पुढील प्रवास सुरू करू शकतील. या नव्या सेवेमुळे फ्लीट ऑपरेटर, डिलिव्हरी एजंट्स आणि सर्वसामान्य प्रवाशांना मोठा दिलासा मिळणार आहे.

या उपक्रमातून एमएमएमओसीएल ला सुमारे ३० लाख रुपयांचे उत्पन्न मिळण्याची अपेक्षा आहे. मुख्यमंत्री देवेंद्र फडणवीस यांनी या निर्णयाचे स्वागत करताना सांगितले की, ही सुविधा मुंबईत इलेक्ट्रिक वाहनांचा वापर वाढवेल आणि प्रदूषणविरहित नागरी जीवनशैलीस मदत करेल. महानगर आयुक्त डॉ. संजय मुखर्जी यांनी या योजनेचे कौतुक करताना सांगितले की, लवकरच मुंबईतील आणखी ३० ठिकाणी अशी बॅटरी स्वॅपिंग केंद्रे सुरू करण्यात येणार आहेत. ही सुविधा म्हणजे मुंबईच्या पर्यावरणपूरक आणि शाश्वत वाहतुकीकडे टाकलेले एक महत्त्वपूर्ण पाऊल आहे.

नियोजित केलेले स्वॅपिंग स्टेशन्स

मेट्रो ७ मार्गिका 

गुंदवली, मोगरा, जोगेश्वरी पूर्व, गोरेगाव पूर्व, आरे, दिंडोशी, कुरार, आकुर्ली, पोईसर, देवी पाडा, राष्ट्रीय उद्यान.

मेट्रो २अ मार्गिका 

दहिसर पूर्व, आनंद नगर, कांदरपाडा, एक्सर, बोरिवली पश्चिम, शिंपोली, कांदिवली पश्चिम, डहाणूकरवाडी, मालाड पश्चिम, लोअर मालाड, बांगूर नगर, ओशिवरा, लोअर ओशिवरा, अंधेरी पश्चिम.

मोनोरेल 

संत गाडगे महाराज चौक, मिंट कॉलनी, नायगाव, वडाळा, फर्टिलायझर टाऊनशिप, चेंबूर