पोलीस भरतीची तयारी करणाऱ्या तरुणीचा जागीच मृत्यू तर एक जखमी, दहा वाहनांना देखील चिरडलं
चंद्रपूर: चंद्रपूरमध्ये एका भीषण अपघाताची नोंद झाली आहे, या अपघातात एका भरधाव गाडीने एक नव्हे दोन नव्हे तर तब्बल दहा वाहनांना चिरडल्याची बातमी समोर आली आहे. हा अपघात चालकाला फिट (Epileptic Attack) आल्यामुळे झाल्याची समजते. चंद्रपूर येथील तुकुम -ताडोबा रस्त्यावर हा अपघात घडला.
सामान्यतः अपघात ट्राफिक, वाहनांमधील तांत्रिक बिघाड, तसेच जर वाहन चालकाने मद्यपान केले असेल, किंवा गाडी नियंत्रणाबाहेर गेली असेल त्या कारणाने होत असतात. मात्र, हा अपघात वेगळ्याच कारणाने झाला. मिळालेल्या माहितीनुसार, हायवा चालकाला फिट आल्यामुळे वाहनावरील नियंत्रण सुटून हा अपघात झाला आहे.
फुटपाथवरील नागरिकांना धडक, एका तरुणीचा मृत्यू तर एक जखमी
अनियंत्रित झालेल्या हायवानं फुटपाथवरील नागरिकांना धडक दिली, तसेच या अपघातामध्ये हायवानं दहा वाहनांना देखील चिरडलं आहे. या अपघातामध्ये पोलीस भरतीची तयारी करणारी लक्कडकोट येथील रहिवासी असलेल्या सानिका कुमरे या तरुणीचा जागीच मृत्यू झाला आहे. तर एक तरुणी जखमी झाली आहे, जखमी तरुणीला स्थानिकांच्या मदतीनं उपचारासाठी रुग्णालयात दाखल करण्यात आलं आहे.
दहा वाहनांना देखील उडवलं
हायवा चालकाला फिट आल्यानं वाहनावरील नियंत्रण सुटून हा अपघात झाला अनियंत्रित झालेल्या हायवानं फुटपाथवरील नागरिकांना धडक दिली, तसेच, चालकाचं नियंत्रण सुटल्यानं या हायवानं दहा वाहनांना देखील उडवलं आहे, या घटनेत या वाहनांचं देखील मोठं नुकसान झालं आहे. दरम्यान या अपघातानंतर पोलिसांनी हायवा चालकाला ताब्यात घेतलं आहे.