मुंबई : रितेश देशमुखने २०२४ मध्ये शिवजयंतीच्या मुहूर्तावर छत्रपती शिवाजी महाराजांच्या शौर्यगाथेवर आधारित ‘राजा शिवाजी’ या ऐतिहासिक चित्रपटाची घोषणा केली होती. त्याचे सेटवर शूटिंग करतानाचे काही फोटो देखील सोशल मीडियावर व्हायरल झाले होते. यामुळेच प्रेक्षक देखील या सिनेमाबद्दलची प्रत्येक अपडेट जाणून घेण्यासाठी आतुर होते.
अखेर अभिनेत्याने स्वत: रिलीज डेटची घोषणा करून ‘राजा शिवाजी’ सिनेमात झळकणाऱ्या कलाकारांची नावंही उघड केली आहेत. रितेश देशमुख दिग्दर्शित ‘राजा शिवाजी’ सिनेमा पुढच्या वर्षी प्रेक्षकांच्या भेटीला येणार आहे. १ मे २०२६ रोजी ( महाराष्ट्र दिन ) हा सिनेमा एकूण ६ भाषांमध्ये प्रदर्शित होईल.
रितेश देशमुखने नुकतंच या सिनेमाचं मोशन पोस्टर प्रदर्शित केलं आहे. अभिनेता लिहितो, “महाराष्ट्राचं आराध्य दैवत, महापराक्रमी राजाधिराज छत्रपती शिवाजी महाराजांना सिनेमारूपी अभिवादन, सादर करत आहोत…राजा शिवाजी!” हा ऐतिहासिक चित्रपट मराठी, हिंदी, तामिळ, तेलुगू, कन्नड, मल्याळम अशा ६ भाषांमध्ये प्रदर्शित होईल. सिनेमाची पहिली झलक पाहताच नेटकऱ्यांनी अभिनेत्यावर कौतुकाचा वर्षाव केला आहे.
इगतपुरी : इगतपुरी तालुक्यातील मुंडेगाव शिवारामध्ये असलेल्या जिंदाल कंपनीला मध्यरात्री दीड वाजेच्या सुमारास भीषण आग लागली. या अग्नी तांडवा मध्ये ...
रितेश देशमुखने या पोस्टसह सिनेमात झळकणाऱ्या कलाकारांची नावंही जाहीर केली आहेत. संजय दत्त, अभिषेक बच्चन, महेश मांजरेकर, सचिन खेडेकर, भाग्यश्री, फरदीन खान, जितेंद्र जोशी, अमोल गुप्ते अशा दिग्गज कलाकारांची मांदियाळी या सिनेमात प्रेक्षकांना पाहायला मिळणार आहे. याशिवाय रितेशची पत्नी जिनिलीया देशमुख देखील या सिनेमात झळकणार आहे.
दरम्यान, ‘राजा शिवाजी’ चित्रपटाचं दिग्दर्शन रितेश देशमुख स्वत: करणार असून, याची निर्मिती ज्योती देशपांडे व जिनिलीया देशमुख करणार आहेत. तसेच या चित्रपटाला अजय-अतुल संगीत देणार आहेत. १ मे २०२६ रोजी हा चित्रपट प्रेक्षकांच्या भेटीला येईल.