भाईंदर : मीरा-भाईंदर महापालिकेच्या परिवहन बसला भीषण अपघात झाला. या अपघातात चालकाच्या प्रसंगावधनामुळे सुदैवाने कोणतीही जीवितहानी झाली नसली तरी बसचे मोठे नुकसान झाले आहे.
मीरा-भाईंदर महापालिकेच्या परिवहन सेवेची भाईंदर रेल्वे स्थानक ते चौक बस मार्ग क्रमांक १ ही बस भाईंदर वरून चौककडे गेली. रोजच्या प्रमाणे बस प्रवाशांनी पूर्णपणे भरलेली होती. चौक येथून उतरणीवर बस असताना अचानक ब्रेक नादुरुस्त होऊन लागत नसल्याने गंभीर परिस्थिती निर्माण झाली होती. बस चालकाने प्रसंगवधान साधून मोठ्या कौशल्याने वेग कमी करत बसवर ताबा घेत बस थांबवली; परंतु ती डिव्हायडरवर आदळली गेली. अन्यथा ती उलटण्याची शक्यता होती. त्यामुळे मोठा अनर्थ घडला असता. सुदैवाने अपघातात कोणालाही दुखापत झाली नाही. अपघातामुळे पुन्हा एकदा परिवहन सेवेच्या नादुरुस्त बसचा प्रश्न ऐरणीवर आला आहे.