गीत : भा. रा. तांबे
स्वर : आशा भोसले, सुधीर फडके
तुझ्या गळां, माझ्या गळां
“तुझ्या गळां, माझ्या गळां
गुंफूं मोत्यांच्या माळा-”
“ताई, आणखि कोणाला?”
“चल रे दादा चहाटळा !”
“तुज कंठी, मज अंगठी !”
“आणखि गोफ कोणाला?”
“वेड लागलें दादाला !”
“मला कुणाचें? ताईला !”
“तुज पगडी, मज चिरडी !”
“आणखि शेला कोणाला?”
“दादा, सांगूं बाबांला?”
“सांग तिकडच्या स्वारीला!”
“खुसूं खुसूं, गालिं हसूं-”
“वरवर अपुले रुसूं रुसूं”
“चल निघ, येथे नको बसूं”
“घर तर माझें तसू तसू.”
“कशी कशी, आज अशी”
“गम्मत ताईची खाशी !”
“अता कट्टी फू दादाशीं”
“तर मग गट्टी कोणाशीं?”
गीत : पी. सावळाराम
स्वर : लता मंगेशकर
हृदयी जागा तू अनुरागा
हृदयी जागा तू अनुरागा,
प्रीतीला या देशील का?
बांधिन तेथे घरकुल चिमणे
स्वर्गाचे ते रूप ठेंगणे
शृंगाराचे कोरीव लेणे,
राहावयाला येशील का?
दोन मनांची उघडी दारे
आत खेळते वसंतवारे
दीप लोचनी सदैव तू रे,
संध्यातारक होशील का?
घराभोवती निर्झर नाचे
जाणुन अपुल्या गूढ मनाचे
झाकुन डोळे एकांताचे,
जवळी मजला घेशील का?