Prices Of Chicken : जीबीएसचा परिणाम: चिकनचे दर घसरले, तर मासळी महागली!

पुणे : देशभरात गिलियन बॅरे सिंड्रोम (GBS) या संसर्गजन्य आजाराचा प्रभाव वाढत असून त्याचा परिणाम खाद्यपदार्थांच्या किमतींवरही दिसून येत आहे. पुण्यातील चिकन बाजारात मागणी घटल्याने दर घसरले आहेत, तर मासळीच्या मर्यादित पुरवठ्यामुळे त्याचे दर चढे राहिले आहेत.

जीबीएसचा धोका आणि अफवांमुळे ग्राहकांमध्ये भीती निर्माण झाली असून चिकन खरेदीकडे अनेकांनी पाठ फिरवली आहे. परिणामी, मागणीत तब्बल २० ते ३० टक्क्यांनी घट झाली आहे. मागणी कमी झाल्यामुळे दरही कमी झाले असून चिकनचा दर प्रतिकिलो २० ते ३० रुपयांनी घटला आहे. गावरान अंड्यांचे दरही शेकड्यामागे ४० ते ५० रुपयांनी कमी झाले आहेत.

दुसरीकडे, मासळीच्या किमती मात्र वाढलेल्या आहेत. पूर्व आणि पश्चिम किनारपट्टीवरून गणेश पेठेतील मासळी बाजारात अपेक्षेपेक्षा कमी आवक झाल्याने पुरवठ्यावर परिणाम झाला आहे. पुरवठा कमी असल्याने दर उच्चांकी पातळीवर कायम आहेत.

देशाच्या पूर्व व पश्चिम किनारपट्टीहून गणेश पेठेतील मासळी बाजारात मागणीच्या तुलनेत कमी प्रमाणात आवक असल्याने मासळीचे तेजीतील दर कायम आहेत. परिणामी दरातही किलोमागे २० ते ३० रुपयांनी घसरण झाली आहे. गावरान अंड्यांचे दरही शेकड्यामागे ४० ते ५० रुपयांनी उतरले असून, मटणाचे दर स्थिर आहेत.

गणेश पेठेतील मासळी बाजारात खोल समुद्रातील मासळी १० ते १५ टन, खाडीच्या मासळीची ४०० किलो आणि नदीच्या मासळीची एक ते दीड टन आवक झाली. आंध्र प्रदेश येथून राहू, कतला आणि सिलनची सुमारे २० ते २५ टन इतकी आवक झाल्याची माहिती मासळीचे व्यापारी ठाकूर परदेशी, चिकन-अंड्याचे व्यापारी रूपेश परदेशी आणि मटणाचे विक्रेते प्रभाकर कांबळे यांनी दिली.

मटणाचे दर स्थिर

चिकन आणि मासळीच्या दरात चढ-उतार दिसत असताना, मटणाच्या किमतीत मात्र कोणताही मोठा बदल झालेला नाही. बाजारातील व्यापाऱ्यांच्या मते, सध्या लोक चिकनऐवजी मटणाकडे वळत असले तरी, पुरवठा पुरेसा असल्याने दर स्थिर आहेत.

ग्राहक व व्यापारी चिंतेत

जीबीएसमुळे चिकन विक्रीत घट झाल्याने व्यापारी अडचणीत आले आहेत. अनेक पोल्ट्री व्यवसायिकांना आर्थिक तोटा सहन करावा लागत आहे. दुसरीकडे, मासळीच्या वाढत्या किमतींमुळे ग्राहक नाराज आहेत. बाजारातील व्यापाऱ्यांच्या मते, पुरवठा सुरळीत झाल्यास मासळीच्या दरात काही प्रमाणात स्थिरता येऊ शकते, पण चिकनबाबतची स्थिती सध्या अनिश्चित आहे.

दरम्यान, खाद्यतज्ज्ञ आणि डॉक्टरांचे म्हणणे आहे की, योग्य प्रकारे स्वच्छता राखल्यास आणि पुरेसे शिजवल्यास चिकन आणि मासळी खाणे सुरक्षित आहे. मात्र, अफवांमुळे लोकांत भीती वाढली असून परिणामी चिकनच्या मागणीवर मोठा परिणाम झाला आहे.