पंतप्रधान मोदी महाकुंभमेळ्यात जाणार ?

नवी दिल्ली : पंतप्रधान नरेंद्र मोदी बुधवार ५ फेब्रुवारी रोजी महाकुंभमेळ्यात जाणार आहेत. ते उत्तर प्रदेशमधील प्रयागराज येथे सुरू असलेल्या महाकुंभमेळ्यात जाऊन साधुसंतांचे आशीर्वाद घेणार आणि पवित्र नदीत स्नान करणार आहेत. पंतप्रधान मोदी बुधवारी सकाळी ११ ते ११.३० दरम्यान पवित्र नदीत स्नान करणार असल्याचे वृत्त आहे.



दिल्ली विधानसभेच्या सर्व ७० जागांसाठी एका टप्प्यात मतदान होणार आहे. हे मतदान बुधवार ५ फेब्रुवारी रोजी होणार आहे. याच दिवशी पंतप्रधान मोदी दिल्ली बाहेर महाकुंभमेळ्यात जाणार आहेत. दिल्ली विधानसभेसाठी मतमोजणी आणि निकाल शनिवार ८ फेब्रुवारी रोजी आहे. याआधी पंतप्रधान महाकुंभमेळ्याला जाणे रद्द करणार असल्याचे वृत्त होते. महाकुंभमेळ्यात झालेल्या चेंगराचेंगरीनंतर ही शक्यता व्यक्त होत होती. पण व्यवस्थापनाने परिस्थिती नियंत्रणात आली. यानंतर ठरल्याप्रमाणे पंतप्रधान मोदी यांचा महाकुंभमेळ्याचा दौरा जाहीर झाला आहे.



महाकुंभमेळ्यात आतापर्यंत १३ जानेवारी रोजी पौषातील पौर्णिमेनिमित्त तसेच १४ जानेवारी रोजी मकरसंक्रांतीनिमित्त, २९ जानेवारी रोजी मौनी अमावस्येनिमित्त, ३ फेब्रुवारी रोजी वसंत पंचमी निमित्त पवित्र स्नान झाले आहे. आता १२ फेब्रुवारी रोजी माघ पौर्णिमा आणि २६ जानेवारी रोजी महाशिवरात्रीनिमित्त पवित्र स्नान होणार आहे. पवित्र स्नानाच्या दिवशी होणाऱ्या अफाट गर्दीमुळे सुरक्षिततेसाठी पंतप्रधान मोदी महत्त्वाच्या दिवसाऐवजी बुधवारी ५ फेब्रुवारी रोजी महाकुंभमेळ्यात सहभागी होणार आहेत. आतापर्यंत कोट्यवधी भाविकांनी महाकुंभमेळ्यात पवित्र स्नान करुन साधूसंतांचे आशीर्वाद घेतले आहे. देवदर्शन केले आहे. देशातील अनेक नेत्यांनीही महाकुंभमेळ्यात पवित्र स्नान केले आहे. यात केंद्रीय गृहमंत्री अमित शाह, संरक्षणमंत्री राजनाथ सिंह, भूतानचे राजे अशा अनेक दिग्गजांचा समावेश आहे.