सिंदखेडराजाहून नाशिकला जात होती बस
जालना : राज्यभरात अपघातांच्या घटनांमध्ये (Accident news) सातत्याने वाढ होताना दिसून येत आहे. त्यातच आता जालन्याच्याजवळ (Jalna Accident) असणाऱ्या सिंदखेड राजा चौकात मोठा अपघात झाला आहे. एका सायकलस्वाराला वाचवण्याच्या नादात बस आणि ट्रकचा विचित्र अपघात झाला. या अपघातात १७ जण जखमी झाले असून त्यांना उपचारासाठी जालन्यातील जिल्हा रुग्णालयात दाखल करण्यात आले आहे. सुदैवाने यात कोणतीही जीवितहानी झाली नाही.
मिळालेल्या माहितीनुसार, जालन्यापासून जवळच असणाऱ्या सिंदखेडराजाहून नाशिकला जाणाऱ्या बससमोर सायकलचालक येत असल्याचे दिसताच बसचालकाने त्याला वाचवण्यासाठी जोरात ब्रेक दाबला. यामुळे बस उलटी फिरत मागे असणाऱ्या ट्रकला आदळली. या अपघातामुळे हादरा बसल्याने १७ जण जखमी झाले. यात वृद्धांसह महिला आणि लहान मुलांचाही समावेश आहे.
या अपघातामुळे बसच्या समोरील भागाचा चुराडा झाला असून खिडकीच्या काचाही फुटल्या आहेत. अपघातानंतर परिसरात मोठी खळबळ उडाली होती. सिंदखेड राजा चौकात झालेल्या अपघातानंतर बसमधील प्रवाशांना तातडीने रुग्णालयात उपचारासाठी नेण्यात आले. यानंतर जेसीबीच्या साहाय्याने रस्त्यावरून बसला हलवण्यात आले.