शेतकऱ्यांना धमकवण्यासाठी जाताना वापरली होती कार
पुणे : गेल्या काही दिवसांपासून आयएएस अधिकारी पूजा खेडकर (Pooja Khedkar) वादग्रस्त पद्धतीने चर्चेत आल्या आहेत. त्यांचे अनेक कारनामे दिवसेंदिवस उघडकीस येत आहेत, त्यातच त्यांची आई मनोरमा खेडकरलाही (Manorama Khedkar) अटक झाली आहे. काही दिवसांपूर्वी हातात पिस्तुल घेऊन शेतकऱ्यांना धमकावतानाचा त्यांचा व्हिडीओ व्हायरल (Video viral) झाला होता. या प्रकरणी कारवाई करत पोलिसांनी त्यांना अटक केली. तर आता पुढील कारवाई करत या व्हिडीओमध्ये दिसलेली मनोरमा खेडकरांची कार देखील पोलिसांनी जप्त केली आहे. त्यामुळे खेडकरांच्या अडचणी आणखी वाढल्या आहेत.
पूजा खेडकर यांच्या आई मनोरमा खेडकर यांनी हातात पिस्तूल घेऊन मुळशी तालुक्यातील धडवली गावातील शेतकऱ्यांना धमकवतानाचा व्हिडीओ व्हायरल झाल्यानंतर याप्रकरणी मनोरमा खेडकर यांना अटक करण्यात आली. दरम्यान, यावेळी त्यांनी ज्या टोयोटा कारचा उपयोग केला होता, ती कार पोलिसांनी जप्त केली आहे.
पूजा खेडकर दिल्लीला रवाना?
तर दुसरीकडे, क्राइम ब्रान्चने (Crime branch) गुन्हा दाखल केल्यानंतर पूजा खेडकरने दिल्लीच्या दिशेने उड्डाण केले असल्याचे सांगण्यात येत आहे. परंतु दिल्ली क्राईम ब्रांचकडे पूजा खेडकरच्या दिल्लीवारीची कोणतीही माहिती नाही. तसेच दिल्ली क्राइम ब्राँचने खेडकर यांना बोलावण्याविषयीच्या वृत्ताला त्यांनी फेटाळून लावले आहे.
मनोरमा खेडकरांच्या अडचणी वाढल्या
मनोरमा खेडकरला अखेर गुरुवारी सकाळी महाड येथून ताब्यात घेण्यात आलं. पुणे ग्रामीण पोलिसांच्या गुन्हे शाखेसह पौड पोलिसांनी ही कारवाई केली. पिस्तुल रोखून एका शेतकऱ्याला धमकावल्याचा आरोप मनोरमावर होता. याप्रकरणी पौड पोलिस ठाण्यामध्ये खेडकर दाम्पत्यावर गुन्हा दाखल झाला होता. त्यानंतर मनोरमा खेडकर फरार झाली होती. मनोरमा खेडकरला ज्या होम स्टे (हॉटेल) मधून पकडण्यात आले, तेथे नाव बदलून ती राहत असल्याची माहिती पोलीस अधीक्षक पंकज देशमुख यांनी दिली आहे.