लवकरच येणार 'ती' न्यूज...
मुंबई : बॉलिवूडमध्ये (Bollywood) आपल्या विविधांगी भूमिकांनी अल्पावधीतच प्रेक्षकांच्या मनात स्थान मिळवलेला अभिनेता विकी कौशल (Vicky Kaushal) आणि बॉलिवूड अभिनेत्री कतरिना कैफ (Katrina Kaif) हे जोडपं सोशल मीडियावर (Social media) कायम चर्चेत असतं. काही दिवसांपूर्वी या जोडप्याचा लंडनमध्ये फिरत असतानाचा व्हिडीओ व्हायरल झाला होता. यामध्ये विकी कतरिनाची काळजी घेताना दिसला होता. यामुळे कतरिना प्रेग्नंट असल्याच्या चर्चांना उधाण आलं होतं. दरम्यान, विकी कौशल आपल्या आगामी 'बॅड न्यूज' (Bad newz) या चित्रपटाच्या ट्रेलर लाँचसाठी आला होता, यावेळेस पॅपराझींनी अखेर त्याला याबाबत प्रश्न विचारलाच. यावेळेस विकीनेही मौन सोडलं आहे.
विकी कौशल आणि कतरिना कैफ यांच्या लग्नाला जवळपास ३ वर्षे पूर्ण झाली आहेत. बॅड न्यूज चित्रपटाच्या ट्रेलर लाँचच्या वेळी पॅप्सने विकी कौशलला विचारले, 'खरी गुड न्यूज कधी येणार आहे?' यावर विकी कौशलने आधी स्मित हास्य करत म्हटले की 'जेव्हा ती गुड न्यूज येईल तेव्हा मी तुम्हा सर्वांना सांगेन. सध्या आम्ही आणत असलेल्या 'बॅड न्यूज'चा आनंद घ्या. पण, त्या बातमीची वेळ आली की नक्की सांगेन', असेही विकीने म्हटले.
कधी रिलीज होणार 'बॅड न्यूज'?
धर्मा प्रोडक्शनच्या बॅनर अंतर्गत निर्मिती झालेल्या बॅड न्यूज चित्रपटाचे दिग्दर्शन आनंद तिवारी यांनी केले आहे. आनंद तिवारी यांनी यात अभिनेता म्हणूनही काम केले आहे. बॅड न्यूज हा चित्रपट १९ जुलै रोजी चित्रपटगृहात झळकणार आहे. त्याचा ट्रेलरही लोकांना आवडला आहे. चित्रपटात विकी कौशल शिवाय तृप्ती डिमरी आणि एमी वर्क हे महत्त्वाच्या भूमिकेत दिसणार आहेत.