Chandu Champion: ‘या’साठी अभिनेता कार्तिक आर्यन गिरवतोय मराठीचे धडे

१४ महिन्यांची कठोर मेहनत

मुंबई : साजिद नाडियादवाला आणि कबीर खान यांनी संयुक्तपणे निर्मिती केलेला आगामी ‘चंदू चॅम्पियन’ (Chandu Champion) हा यंदा प्रदर्शित होणाऱ्या मोठ्या चित्रपटांपैकी एक आहे. या चित्रपटाद्वारे विलक्षण कथा प्रेक्षकांसमोर सादर होणार आहे. तसेच चित्रपटात प्रमुख भूमिका साकारणारा प्रसिद्ध बॉलिवूड (Bollywood) अभिनेता कार्तिक आर्यन (Kartik Aaryan) नव्या अवतारात दिसणार आहे. त्याने या आगामी चित्रपटासाठी कंबर कसली आहे.

चंदू चॅम्पियन चित्रपटातील भूमिका हूबेहूब साकारण्यासाठी कार्तिक आर्यन अथक परिश्रम करत आहे. चित्रपटातील मराठी संवाद बोलण्यासाठी आणि बोली भाषा शिकण्यासाठी त्याने १४ महिन्यांचं प्रशिक्षण घेतलं असल्याचं सांगण्यात येत आहे. कार्तिकने चित्रपटासाठी १४ महिने मराठी बोलीवर लक्ष केंद्रित केलं होतं. मराठीवर प्रभुत्व असलेल्या एका शिक्षकाने त्याला भाषेवर चांगली पकड मिळवण्यास मदत केली. तसेच कार्तिकने चित्रपटाकरीता शारीरिकदृष्ट्या व व्यक्तिमत्त्वाच्या दृष्टीनेही कठोर मेहनत घेतली आहे.

चंदू चॅम्पियन चित्रपट येत्या १४ जून रोजी प्रदर्शित होणार आहे. तसेच चित्रपटातील कार्तिकने घेतलेली मेहनत व मराठी भाषासंपदा पाहण्यासाठी प्रेक्षकांची उत्सुकता वाढत चालली आहे.