पुणे : दिवसागणिक चोरीच्या घटना वाढत असताना त्यातच पुण्यातील नगर रस्त्यावरील लोणीकंद परिसरात असणाऱ्या बिवरी गावातील एका घरावर मध्यरात्री सात दरोडेखोरांनी सशस्त्र दरोडा टाकला. दरोडेखोरांनी महिलांना शस्त्राचा धाक दाखवून तब्बल १६ लाख रुपयांचा मुद्देमाल लंपास केला आहे.
प्रशांत गोते आणि त्यांचे कुटुंब मंगळवारी रात्री जेवण करून झोपले. मध्यरात्री पावणेदोनच्या सुमारास सात ते आठजण त्यांच्या घराजवळ आले. त्यांच्याकडे तीक्ष्ण शस्त्रे होती. घराचा दरवाजा कटावणीने उखडण्यात आल्याने गोते कुटुंबीय झोपेतून जागे झाले. दरोडेखोर गोते कुटुंबीयांच्या घरात शिरले. गोते कुटुंबीयाला चाकू, तसेच तीक्ष्ण शस्त्राचा धाक दाखविण्यात आला. दरोडखोरांनी शयनगृहातील कपाटामधील पाच लाखांची रोकड आणि दागिने काढून घेतले.
याबाबत प्रशांत विलास गोते यांनी लोणीकंद पोलीस ठाण्यात फिर्याद दिली आहे. चोरट्यांनी गोते कुटुंबातील महिलांच्या गळ्याला चाकू लावून मारण्याची धमकी दिली. व त्यांचे अंगावरील दागिने काढून घेण्यात आले. दरोडेखोरांनी प्रशांत गोते यांच्या आईला आणि बहिणीला मारहाण केली. अशी माहिती लोणीकंद पोलीस ठाण्याचे वरिष्ठ पोलीस निरीक्षक कैलास करे यांनी दिली.
दरोडा टाकल्यानंतर चोरट्यांनी पोलिसांशी संपर्क साधू नये यासाठी कुटुंबातील सर्वांचे मोबाइल संच फोडण्यात आले. पसार झालेल्या चोरट्यांचा मार्ग काढण्याठी लोणीकंद पोलिसांची पथके रवाना झाली आहेत. दरोडा पडल्यानंतर बिवरी गावातील ग्रामस्थांमध्ये भीतीचे वातावरण पसरले आहे.