मनी लाँड्रिंग प्रकरणात केली कारवाई
मुंबई : लोकसभा निवडणुका (Loksabha Election) जवळ आलेल्या असताना ठाकरे गट (Thackeray group) मात्र अधिकाधिक अडचणीत सापडत चालला आहे. ठाकरे गटाच्या महत्त्वाच्या नेत्यांविरोधात ईडीने (ED) गुन्हे दाखल केले आहेत. कोविड घोटाळ्यात (Covid scam) किशोरी पेडणेकर, संजय राऊत, सुजित पाटकर तर रविंद्र वायकर, वैभव नाईक, अनिल परब, राजन साळवी यांची नावेही आर्थिक घोटाळ्यांमध्ये सापडली आहेत. त्यामुळे उद्धव ठाकरे (Uddhav Thackeray) चिंतेत असताना आणखी एक धक्का त्यांना पचवावा लागणार आहे. खासदार अनिल देसाई (Anil Desai) यांचे खासगी सचिव दिनेश बोभाटे (Dinesh Bobhate) यांच्याविरोधात ईडीने गुन्हा दाखल केला आहे. बोभाटे तपास यंत्रणाच्या फेऱ्यात अडकल्यामुळे अनिल देसाई यांच्याही अडचणी वाढू शकतात.
ईडीकडून आज अनिल देसाई यांचे खासगी सचिव दिनेश बोभाटे यांच्याविरोधात मनी लाँड्रिंगचा गुन्हा दाखल करण्यात आला. दिनेश बोभाटे यांच्यावर काही दिवसापूर्वीच सीबीआयने भ्रष्टाचाराचा गुन्हा दाखल केला होता. त्याआधारावरच आता ईडीने बोभाटे यांच्याविरोधात गुन्हा दाखल केला आहे.
काय आहे आरोप?
दिनेश बोभाटे यांच्या विरोधात २ कोटी ६० लाख रुपयांची रक्कम बेहिशेबी कमवल्याचा आरोप करण्यात आला आहे. १७ जानेवारीला त्यांच्याविरोधात मुंबई कार्यालयात गुन्हा दाखल केला होता, आता ईडीकडूनही गुन्हा दाखल करण्यात आला आहे. दिनेश बोभाटे २०१३ ते २०२३ दरम्यानच्या कालावधीत एका इन्शुरन्स कंपनीत असिस्टंट आणि सिनियर असिस्टंट म्हणून काम करत होते. यादरम्यान त्यांनी संबंधित इन्शुरन्स कंपनीत काम करत असताना जवळपास ३६ टक्के बेहिशेबी मालमत्ता कमवल्याचा आरोप आहे.