नवी दिल्ली : आम आदमी पार्टीचे राज्यसभा खासदार संजय सिंह यांनी दिल्लीच्या कथित मद्य घोटाळ्यातून (Liquor Scam) कोट्यवधींची संपत्ती जमवल्याचे पुरावे आपल्याकडे असल्याचा दावा ईडीने (ED) केला आहे. या प्रकरणात त्यांना नुकतीच अटक झाली आहे.
दिल्लीतील आता रद्द करण्यात आलेले दिल्लीचे मद्य धोरण तयार करण्यात संजय सिंह यांचा प्रामुख्याने सहभाग होता, त्यांना दिनेश अरोरा यांनी कोट्यवधी रुपये देऊ केले आहेत, याचे पुरावे आमच्याकडे आहेत, असे ईडीने म्हटल्याचे वृत्त सूत्रांच्या हवाल्याने इंडिया टुडेने दिले आहे.
सन २०२१-२२ च्या दिल्लीच्या अबकारी धोरण प्रकरणाशी संबंधित मनी लाँड्रिंगच्या चौकशीसंदर्भात राज्यसभा खासदार संजय सिंह यांना बुधवारी ईडीने अटक केली. आम आदमी पार्टीचा तिसरा सर्वोच्च नेता एका केंद्रीय एजन्सीने ताब्यात घेतल्याने दिल्लीच्या सत्ताधारी पक्षाला अर्थात आप पक्षाला मोठा धक्का बसला आहे. माजी उपमुख्यमंत्री मनीष सिसोदिया यांच्यानंतर आता या प्रकरणाशी संबंधित प्रकरणात अटक झालेले संजय सिंह हे आपचे हायप्रोफाईल नेते आहेत.