Ajit Pawar’s NCP : फोटो वापरायला शरद पवारांनी नकार दिला असला तरीही अजितदादांच्या गटाला मिळतंय आणखी बळ…

सातार्‍यातही जयंत पाटलांच्या समर्थकांची अजित पवारांच्या बैठकीला उपस्थिती

बीड : डॉ. योगेश क्षीरसागर (Dr. Yogesh Kshirsagar) यांनी राष्ट्रवादी काँग्रेसच्या अजित पवार (Ajit Pawar’s NCP) गटात बुधवारी प्रवेश केला. उपमुख्यमंत्री अजित पवारांसह प्रमुख नेत्यांच्या उपस्थितीत क्षीरसागरांचा प्रवेश झाला. क्षीरसागर यांच्या कार्यक्रमावेळी फ्लेक्सवर शरद पवारांचा (Sharad Pawar) फोटो नसल्यानं माध्यमांमध्ये चर्चा रंगल्या होत्या. मिळालेल्या माहितीनुसार शरद पवारांचा फोटो फ्लेक्सवर न वापरण्याच्या सूचना कार्यकर्त्यांना मिळाल्याचं समोर येत आहे. बीडमधील सभेच्या टिझरमध्ये देखील शरद पवारांचा फोटो वापरणं टाळण्यात आलं होतं.

अजित पवार गटाने बॅनर्सवर शरद पवारांचा फोटो न वापरण्याचं कारण म्हणजे ‘फोटो वापराल तर कोर्टात खेचेन’ असा इशाराच शरद पवार यांनी अजित पवार गटाला दिला होता. त्यामुळे खबरदारीचा उपाय म्हणून शरद पवार यांचा फोटो फ्लेक्सवर किंवा इतरत्र कोठे न वापरण्याच्या सूचना कार्यकर्त्यांना देण्यात आल्या. असं असलं तरी डॉ. योगेश क्षीरसागर यांच्या पक्षप्रवेशामुळे बीडमध्ये अजितदादांच्या राष्ट्रवादीला आणखी बळ मिळणार आहे.

अजित पवार यांनी योगेश क्षीरसागरांच्या पक्षप्रवेशावेळी विश्वासाला तडा जाऊ देणार नाही, असा शब्द देत आगामी निवडणुकीच्या पार्श्वभूमीवर बीडसाठी नवे संकेतही दिले. मी आणि माझ्या समर्थकांनी विश्वास टाकून राष्ट्रवादी काँग्रेसमध्ये (अजित पवार गट) प्रवेश केला, असं क्षीरसागर यावेळी म्हणाले. शिवाय अजित पवार यांनी काल सातारा येथे बोलावलेल्या बैठकीलाही शरद पवार गटाचे नेते जयंत पाटील (Jayant Patil) यांच्या अनेक समर्थकांनी हजेरी लावली होती. त्यामुळे हे सर्व पदाधिकारी अजित पवार यांच्यासोबत जाणार का याची चर्चा आता सुरु झाली आहे. तासगावातून प्रताप पाटील यांच्यासह तासगाव तालुक्यातील काही नेते आणि पक्षाचे प्रमुख कार्यकर्ते अजित पवार गटात जाणार आहेत.

Get latest Marathi News, Maharashtra News and Latest Mumbai News from Politics, Sports, Entertainment, Business and local news from Mumbai and All cities of Maharashtra