छत्रपती संभाजीनगर: छत्रपती संभाजीनगरच्या जिल्हा नियोजन समितीच्या बैठकीत निधीवाटपावरून आज शिवसेना व ठाकरे गटाच्या नेत्यांमध्ये चांगलीच जूंपली. ठाकरे गटाच्या आमदाराला निधी मिळत नसल्याचा कांगावा करत विरोधी पक्षनेते अंबादास दानवे आणि मंत्री संदिपान भुमरे व अब्दुल सत्तार हे हमरीतुमरीवर आल्याचे पाहायला मिळाले.
आज जिल्हाधिकारी कार्यालयात जिल्हा नियोजन समितीची बैठक आयोजित करण्यात आली होती. यावेळी ठाकरे गटाचे आमदार उदयसिंग राजपूत यांनी आपल्याला निधी मिळत नसल्याचा मुद्दा उपस्थित केला. यावरुन मंत्री संदीपान भुमरे यांनी आणि अब्दुल सत्तार यांनी आमदार राजपूत यांचा एकेरी उल्लेख केल्याने शाब्दिक चकमक उडाली. त्यानंतर विरोधी पक्षनेते अंबादास दानवे आमदार राजपूत यांच्या मदतीला धावून आले आणि मंत्री भुमरे आणि सत्तार यांना सुनावले. यावरुन थेट हमरीतुमरी सुरु झाली आणि हा वाद थेट एकमेकांच्या अंगावर जाण्यापर्यंत पोहोचला असल्याचे समोर आले.