जळगाव : एरंडोल-कासोदाकडे जात असताना पोलिसांच्या गाडीवर अंजनी धरणाजवळ रस्त्यावर गुरुवारी रात्री नऊच्या सुमारास झाड कोसळल्याची घटना घडली. या दुर्दैवी अपघातात आर्थिक गुन्हे शाखेचे सहायक पोलीस निरीक्षक सुदर्शन दातीर व चालक अजय चौधरी हे दोघे जागेवरच ठार झाले. तर चंद्रकांत शिंदे, निलेश सूर्यवंशी, भरत जेठवे हे तीन पोलीस कर्मचारी गंभीर जखमी झाले आहेत.
या घटनेची माहिती मिळताच कासोदा पोलीस ठाण्याच्या सहायक पोलीस निरीक्षक योगिता नारखेडे, गुन्हे शाखेचे पोलीस निरीक्षक किसन पाटील हे तातडीने घटनास्थळी पोहोचले. स्थानिकांच्या मदतीने जखमी पोलिसांना बाहेर काढून त्यांना तातडीने एरंडोल ग्रामीण रुग्णालयात उपचारासाठी दाखल करण्यात आले आहे.