Poem and riddles : फसलेला बेत कविता आणि काव्यकोडी


  • कविता : एकनाथ आव्हाड


ठरवले मी या रविवारी, आरामात उठणार
घड्याळाच्या काट्यावर, मुळीच नाही पळणार

बिछान्यात शिरून, मनसोक्त लोळणार
मैदानावर सुद्धा मी, हवे तेवढे खेळणार

बागेतल्या गुलाबांशी, गप्पाही मारणार
तबला, पेटी, गाण्यात, मस्त रंग भरणार

रविवारचे हे बेत सारे, मीच केले पास
रविवार हा असेल माझा, एकदम झकास!

पण रविवार उजाडला, मोठ्या नाखुशीने
पाहुणे झाले हजर, सकाळच्याच गाडीने

घाई, गडबड आवाजाने, घर गेलं भरून
झोप माझी पळाली, बसलो डोकं धरून

पाहुण्यांची सरबराई, करण्यात वेळ गेला
बेत माझे सारेच, अहो, पडले बाजूला

पाहुण्यांचं बोलणं ऐकून, मी तर चक्रावलो
म्हणे, ‘आज रविवार, म्हणून मुद्दामच आलो.’

काव्यकोडी : एकनाथ आव्हाड


१) शहराच्या अपुऱ्या जागेसाठी
लोक पर्याय शोधतात
शहरापासून दूर दूर
वस्ती करू लागतात

कालांतराने अशी वस्ती
विस्तारत जाते
त्यातूनच सांगा मग
कुणाची निर्मिती होते?

२) मथुरा, उज्जैन, वाराणसी,
जयपूर आणि दिल्ली
खगोलीय वेधशाळांची
निर्मिती येथे झाली

खगोलशास्त्राचा येथे
अभ्यास होतो उत्तम
या खगोलीय वेधशाळांचे
नाव सांगा पटकन?

३) पावसाचे थेंब ढगात
जेव्हा थोपवले जातात
तेव्हा ते थेंब गारांमध्ये
रूपांतरित होतात

मोठ्या गारांसह जेव्हा
पाऊस पडतो मुसळधार
हा सांगा वृष्टीचा
कोणता बरं प्रकार?
उत्तर -
१) उपनगर
२) जंतरमंतर
३) ढगफुटी

eknathavhad23 @gmail.com
Comments
Add Comment

मनाची श्रीमंती!

कथा : रमेश तांबे दिवाळी नुकतीच संपली होती. दिवाळीचे चार-पाच दिवस कसे संपले हे नमिताला कळलेच नव्हते. दिवाळी येणार

पारदर्शक पदार्थ

कथा : प्रा. देवबा पाटील सीता व निता या दोघी बहिणींना जशी अभ्यासाची गोडी होती तशीच वाचनाचीसुद्धा आवड होती. त्या सतत

बदलांचा स्वीकार!

खरे तर बदलांचा स्वीकार करणे याला खूप चांगला इंग्रजी शब्द आहे ऍडॉप्शन! आपण कितीही मनात आणले तरी आपल्याला हवे तसे

कचरा कचराकुंडीतच टाकावा !

लहानशा गोष्टी, मोठा अर्थ : शिल्पा अष्टमकर ‘स्वच्छ मुंबई ,सुंदर मुंबई ‘ असे फलक मुंबईत ठिकठिकाणी आपण पाहतो. अनेक

सूर्यप्रकाशाचे रंग

कथा : प्रा. देवबा पाटील सीता आणि नीता या सख्ख्या बहिणीच असल्याने दोघींचे आपसातही छान मेतकूट जमायचे. दोघीही नेहमी

खरी पूजा

कथा : रमेश तांबे अजितच्या घराजवळच गणपतीचं एक मंदिर होतं. त्याची आजी दररोज सकाळी पूजेसाठी मंदिरात जायची. जवळजवळ