अहमदाबाद: अहमदाबादमधील दरियापूर कडियानाका रस्त्यावर मंगळवारी एका इमारतीच्या दुसऱ्या मजल्यावरील बाल्कनीचा काही भाग रथयात्रा पाहण्यासाठी उभे असलेल्या लोकांवर कोसळल्याची घटना घडली आहे. यात एका युवकाचा मृत्यू झाला. तर ३ मुलांसह १० जण जखमी झाले आहेत. त्यांना सिव्हिल हॉस्पिटलमध्ये दाखल करण्यात आले आहे.
अहमदाबादच्या जमालपूर येथील भगवान जगन्नाथ मंदिरापासून सकाळी ७.४० वाजता रथयात्रेला सुरुवात झाली. तिन्ही रथ सायंकाळी पाच वाजता दरियापूरला पोहोचले. येथे तीनही रथ एका मंदिराजवळ सुमारे १५ मिनिटे थांबले. पूजा करून कडिया नाक्याकडे रवाना झाले. त्यावेळी कडियानाका परिसरात हा अपघात झाला.
या अपघातामागे अहमदाबाद महापालिकेचा निष्काळजीपणाही समोर आला आहे. रथयात्रा मार्गावरील सर्व धोकादायक व जीर्ण घरांना नोटीस देण्यात येणार होती. मात्र चौकशी करूनही या घराला नोटीस बजावण्यात आली नाही. त्याचवेळी जखमींना रुग्णालयात नेले जात असताना महापालिकेचे पथक नोटीस घेऊन घरी पोहोचले.