राष्ट्रवादीच्या वर्धापन दिनाच्या बॅनरवर छगन भुजबळांचा फोटोच नाही!

नाशिकमध्ये चर्चेला उधाण

नाशिक: आज राष्ट्रवादीच्या वर्धापन दिनाचे औचित्य साधून ठिकठिकाणी फलकबाजी सुरु आहे. नाशिक शहरात देखील गल्लोगल्ली फलक लागले असून त्यावर सर्वच ज्येष्ठ आणि प्रमुख नेत्यांसह पदाधिकाऱ्यांच्या छबी झळकत आहेत. मात्र, नवीन नाशिक मधील एका फलकावर दोन चेहरे गायब असल्याने हा फलक चर्चेचा विषय ठरतोय

माजी आमदार अपूर्व हिरे यांनी राष्ट्रवादीच्या वर्धापन दिनानिमित्त लावलेल्या बॅनरवर नाशिकचे ज्येष्ठ राष्ट्रवादी नेते तसेच माजी उपमुख्यमंत्री छगन भुजबळ यांच्यासह शहराध्यक्ष योगिता आहेर यांचा फोटोच नसल्याने नवीन नाशिक परिसरात चर्चेला उधाण आले आहे. नाशिक राष्ट्रवादी काँग्रेसमधील असलेल्या दोन गटांमधील कललगीतूरा या बॅनरने अधोरेखित केल्याची चर्चा शहराच्या राजकीय वर्तुळात सुरु आहे.