निपाणी : कर्नाटक विधानसभा निवडणुकीच्या प्रचाराच्या शेवटच्या दिवशी राष्ट्रवादी काॅंग्रेसचे उमेदवार उत्तम पाटील यांच्या प्रचारासाठी शरद पवार आज निपाणीकडे रवाना झाले आहेत. हेलिकाॅप्टरने ते कागलमध्ये दाखल झाले आहेत. काही वेळातच ते निपाणीला पोहोचतील.
राष्ट्रवादी काॅंग्रेसच्या अध्यक्षपदी कायम राहायचा निर्णय घेतल्यानंतर शरद पवार आज निपाणीला सभा घेणार आहेत. राष्ट्रवादी काॅंग्रेसने कर्नाटक विधानसभा निवडणुकीत ९ उमेदवार उभे केले आहेत. त्यांपैकी एक निपाणी मतदारसंघ आहे. या निपाणी मतदारसंघाचे उमेदवार उत्तम पाटील यांच्या प्रचारासाठी ही सभा आज दुपारी ३ वाजता होणार आहे. त्यानंतर ते त्यांच्या पुढच्या दौर्‍यासाठी रवाना होतील.
काल म्हणजेच ७ मे ला देवेंद्र फडणवीस यांनी निपाणी मतदारसंघातून निवडणूक लढवत असलेल्या भाजपच्या उमेदवार शशिकला जोल्ले यांच्या प्रचारासाठी याच ठिकाणी सभा घेतली होती. निपाणीला ज्या ठिकाणी फडणवीसांची सभा झाली तिथेच शरद पवार आज सभा घेणार आहेत. या ठिकाणी पावसाची शक्यता वर्तवण्यात येत आहे. पाऊस आणि शरद पवारांची सभा आता पुन्हा जुळून येईल की काय अशी चर्चा केली जात आहे.
आज प्रचाराचा शेवटचा दिवस असल्याने शरद पवार सभेतून राष्ट्रवादीला मतं देण्यासाठी नक्की काय आवाहन करणार आहेत याकडे सर्वांचेच लक्ष लागलेले आहे.