भिवंडी : भिवंडी तालुक्यातील पडघा विभागात तथागत भगवान गौतम बुध्द अस्थिधातू कलश वंदन व आंतरराष्ट्रीय बौध्द भिक्खु संघ थायलंड यांची धम्मपद यात्रा स्वागत समारंभ आयोजित करण्यात आला आहे. तसेच रविवारी १२ फेब्रुवारी रोजी दुपारी १२.३० वाजता क्रांतीसुर्य महात्मा ज्योतिबा फुले व विश्वरत्न डॉ. बाबासाहेब आंबेडकर संयुक्त जयंती महोत्सव पडघे विभाग यांच्या वतीने पडघा टोलनाक्या जवळील मुंबई-नाशिक हायवे जवळील गोपाळास हॉटेल येथे होणार आहे.
यावेळी पडघा विभागातील नागरिकांना तथागत भगवान बुध्द यांच्या अस्थिधातू कलशाचे वंदन करता येईल. यावेळी थायलंड येथील ११० बौध्द भिक्खू संघ, धम्मपद यात्रेचे स्वागत करण्यात येणार आहे. थायलंड येथील बौध्द भिक्खू संघाच्या वतीने उपस्थित नागरिकांना धम्मदेसना मिळणार आहे. पडघा व भिवंडी परिसरातील नागरिकांनी पांढरे शुभ्र वस्त्र परिधान करून मोठया संख्येने उपस्थित राहण्याचे आवाहन क्रांतीसुर्य महात्मा ज्योतिबा फुले व विश्वरत्न डॉ. बाबासाहेब आंबेडकर संयुक्त जयंती महोत्सव पडघे विभाग यांचा वतीने करण्यात आले आहे.