पर्यटकांना भाऊबीजेच्या दिवशी करता येणार राणीबागेची सैर

मुंबई (प्रतिनिधी) : दिवाळीची सुट्टी लक्षात घेत पर्यटकांच्या सोयीसाठी भायखळा येथील राणी बाग भाऊबीजच्या दिवशी बुधवारी सुरू ठेवण्याचा निर्णय पालिकेने घेतला आहे. मात्र भाऊबीजेच्या दुसऱ्या दिवशी म्हणजेच गुरुवार २७ ऑक्टोबरला वीरमाता जिजाबाई भोसले उद्यान व प्राणिसंग्रहालय बंद राहील.

वीरमाता जिजाबाई भोसले उद्यान व प्राणिसंग्रहालय दर बुधवारी बंद असते. मात्र, यापूर्वी महानगरपालिकेने मंजूर केलेल्या ठरावानुसार बुधवारी सार्वजनिक सुट्टी आल्यास त्या बुधवारी हे उद्यान व प्राणिसंग्रहालय जनतेसाठी खुले राहणार. त्यानुसार येत्या बुधवारी म्हणजेच दिनांक २६ ऑक्टोबर २०२२ रोजी ‘भाऊबीज’, ‘दीपावली पाडवा’ निमित्त सार्वजनिक सुट्टी आहे.

मात्र, या सुट्टीच्या दिवशीही उद्यान व प्राणिसंग्रहालय पर्यटकांकरिता खुले राहणार आहे. जेणेकरून या सुट्टीच्या दिवशी पर्यटकांना उद्यान व प्राणिसंग्रहालयातील प्राणी, वनस्पती, पक्षी यांना बघता येईल. त्यानुसार बुधवारी हे उद्यान व प्राणिसंग्रहालय जनतेकरिता खुले असल्यास त्याच्या दुसऱ्या दिवशी म्हणजे गुरुवारी ते बंद ठेवण्यात येते. यानुसार हे प्राणिसंग्रहालय गुरुवार, दिनांक २७ ऑक्टोबर, २०२२ रोजी जनतेकरिता बंद राहणार आहे.