मुंबई (वार्ताहर) : उपनगरी रेल्वे मार्गावरील रुळांची दुरुस्ती तसेच सिग्नल यंत्रणेत काही तांत्रिक कामे करण्यासाठी रविवारी १६ ऑक्टोबर रोजी रेल्वेच्या तिन्ही मार्गावर मेगाब्लॉक घेण्यात येणार आहे. मध्य रेल्वेच्या माटुंगा ते ठाणे अप आणि डाउन धीम्या मार्गावर, तर हार्बर मार्गावरील पनवेल- वाशी अप आणि डाउन मार्गावर मेगाब्लॉक घेण्यात येणार आहे. पश्चिम रेल्वेवर मरिन लाईन्स ते माहीम अप आणि डाऊन धीम्या मार्गावर ब्लॉक घेण्यात येणार आहे.
मध्य रेल्वे – माटुंगा ते ठाणे अप आणि डाउन धीम्या मार्गावर
कधी- सकाळी ११.०५ ते दुपारी ३.४५ वाजेपर्यंत
परिणाम – ब्लॉकदरम्यान सीएसएमटी येथून सुटणाऱ्या डाउन धीम्या मार्गावरील सेवा माटुंगा आणि ठाणे स्थानकांदरम्यान डाउन जलद मार्गावर वळवण्यात येतील. तर कल्याण येथून सुटणाऱ्या अप धीम्या मार्गावरील सेवा ठाणे ते माटुंगा दरम्यान अप जलद मार्गावर वळवल्या जातील. या गाड्या ठाणे, मुलुंड, भांडुप, विक्रोळी, घाटकोपर, कुर्ला आणि शीव येथे थांबून पुढे माटुंगा येथे अप धीम्या मार्गावर वळवण्यात येतील आणि गंतव्यस्थानी नियोजित वेळेच्या १५ मिनिटे उशिराने पोहोचतील.
हार्बर रेल्वे – पनवेल- वाशी अप आणि डाउन हार्बर मार्गावर
कधी – सकाळी ११.०५ ते सायंकाळी ४.०५ वाजेपर्यंत
परिणाम – ब्लॉक कालावधीत पनवेल येथून सीएसएमटीसाठी सुटणाऱ्या अप हार्बर मार्गावरील सेवा आणि सीएसएमटी येथून पनवेल/बेलापूरकडे जाणाऱ्या डाउन हार्बर मार्गावरील सेवा रद्द राहतील. पनवेल येथून सुटणारी ठाण्याकडे जाणारी अप ट्रान्सहार्बर मार्गावरील सेवा आणि ठाणे येथून पनवेलकरिता जाणारी ट्रान्सहार्बर मार्गावरील सेवा रद्द राहतील. ब्लॉक कालावधीत बेलापूर/नेरूळ आणि खारकोपर दरम्यान उपनगरीय रेल्वे सेवा वेळापत्रकानुसार धावणार आहे. प्रवाशांच्या सुविधेसाठी ब्लॉक कालावधीत सीएसएमटी ते वाशी मार्गावर विशेष उपनगरीय गाड्या धावतील.
पश्चिम रेल्वे – मरीन लाईन्स ते माहीम दरम्यान डाउन धीम्या मार्गावर
कधी – सकाळी १०.३५ ते दुपारी ३.३५ वाजेपर्यंत
परिणाम – ब्लॉकदरम्यान डाउन दिशेच्या सर्व गाड्या मरीन लाईन्स ते माहीम दरम्यान जलद मार्गावर धावतील. या गाड्या महालक्ष्मी, प्रभादेवी आणि माटुंगा रोड येथे थांबणार नाहीत.