मनोर पोलिसांकडून विदेशी दारूचा ७२ लाखांचा साठा जप्त

बोईसर (वार्ताहर) : मनोर पोलिस विभागाने मनोर हद्दीत मोठी कारवाई केली आहे. या कारवाईमध्ये गोवा बनावटीच्या दारूचा साठा जप्त करण्यात आला आहे. ही कारवाई विक्रमगड तालुक्यातील शीलशेत गावच्या हद्दीतील नालशेत रस्त्यावर रविवारी रात्री आठ वाजताच्या सुमारास कारवाईत करण्यात आली. अवैधरित्या विनापरवाना गोवा राज्य निर्मित विदेशी दारू वाहतूक होणार असल्याची खात्रीलायक बातमी मिळाल्यानंतर मनोर पोलिस ठाण्याचे सहाय्यक पोलीस निरीक्षक गजानन पडळकर यांच्या पथकाने कारवाई केली आहे.

मनोर पोलिसांकडून दारू तस्करीवर मोठी कारवाई करण्यात आली असून ७२ लाखांचा मुद्देमाल जप्त करण्यात आला आहे. कारवाईत गोवा राज्यातून पालघर जिल्ह्यात विक्रीसाठी आणलेला दारूचे ७६० बॉक्स जप्त करण्यात आले. कारवाईमध्ये चार वाहने आणि ६ हजार ५६६ बल्क लिटर दारू साठा जप्त करण्यात आला आहे. याप्रकरणी दारूबंदी अधिनियमानुसार गुन्हा दाखल करण्यात आला असून हा जप्त दारू साठा म्हसरोळी गावातील कल्पेश पाटील या दारू तस्कराने गणेशोत्सव काळात विक्रीसाठी गोव्यावरून महाराष्ट्रात आणल्याची माहिती समोर येत आहे. या अगोदरही सदर व्यक्तीवर दारु तस्करीचा गुन्हा दाखल असल्याची माहिती उत्पादन शुल्क विभागाच्या अधिकाऱ्यांनी सांगितले.

गणेशोत्सव काळात पालघर जिल्ह्यात विक्रीसाठी दमण आणि गोवा बनावटीच्या दारूचा मोठा साठा विक्रमगड तालुक्यातील शीळशेत- म्हसरोळी भागात आणला जाणार असल्याची गोपनीय माहिती मनोर पोलिसांना मिळाली होती. माहितीनुसार मनोर पोलिसांच्या पथकाने रविवार रात्री विक्रमगड तालुक्यातील शीळशेत गावच्या हद्दीतील नाळशेत रस्त्यावर सापळा रचला होता. यावेळी नाळशेत गावच्या दिशेने एक संशयित पीक अप टेम्पो जात असल्याचे दिसल्यानंतर पोलिसांच्या पथकाने टेम्पोचा पाठलाग सुरू केला होता. पोलीस पाठलाग करीत असल्याचे लक्षात येताच टेम्पो चालकाने शीळशेत गावच्या हद्दीत नालशेत रस्त्यालगत कच्च्या रस्त्यावर आडोशाला टेम्पो सोडून पळून गेला. टेम्पोची तपासणी केली असता टेम्पोमध्ये दारूचा साठा आढळून आला.

त्यानंतर पोलिसांनी आजूबाजूला शोधमोहीम राबवली असता मोठा टेम्पो, एक पीक अप टेम्पो आणि एक इकोस्पोर्ट कार आढळून आली. तीनही वाहनांची झडती घेतली असता या वाहनांमध्ये दारूचा साठा आढळून आला. घटनास्थळी पोलीस येणार असल्याची चाहूल लागल्याने दारू तस्कर वाहने आणि दारूचा साठा सोडून पळून गेले होते. दारूच्या साठ्यासह चारही वाहने पोलिसांकडून जप्त करण्यात आली आहेत.

याप्रकरणी मनोर पोलीस ठाण्यात महाराष्ट्र दारूबंदी अधिनियम १९४९ च्या ६५ (अ) व (ई) आणि मोटार वाहन कायदा कलम १९८८ चे कलम ६६ (१1)/१९२ नुसार गुन्हा दाखल करण्यात आला आहे.