बल्गेरिया : भारताच्या अंतिम पंघालने बल्गेरियातील २० वर्षांखालील जागतिक कुस्ती स्पर्धेत सुवर्णपदक जिंकून इतिहास रचला. हरियाणातील हिसारची अंतिम पांघलने फक्त सुवर्ण पदक जिंकले नाही तर २० वर्षाखालील जागतिक कुस्ती अजिंक्यपद स्पर्धेत सुवर्ण पदक जिंकणारी पहिली भारतीय महिला कुस्तूपटू देखील बनली.
अंतिम पांघलची आई कृष्णा कुमारी यांनी अंतिमच्या नावामागची गोष्ट सांगितली. कृष्णा कुमारी म्हणाल्या की, 'आम्हाला एकूण चार मुली आहेत. त्यामुळे आम्ही या शेवटच्या मुलीचे नाव अंतिम ठेवले कारण आम्हाला अजून मुली नको होत्या. ही शेवटची मुलगी म्हणून तिचे नाव अंतिम ठेवले.'
अंतिमच्या जन्मानंतर कुटुंबीय निराश असले तरी खेळाप्रति तिचे वेड पाहून त्यांचे विचार बदलले. अंतिमचे पिता रामनिवास सांगतात, ‘मुलगी कुस्तीबाबत अतिशय गंभीर होती. त्यामुळे आम्हाला गाव सोडून हिसारला स्थायिक व्हावे लागले. अंतिमला शुद्ध दूध मिळावे म्हणून घरी तीन म्हशी आणि एक गाय विकत घेतली. पैशांची चणचण भासताच ट्रॅक्टरसुद्धा विकला.’ प्रशिक्षक प्रदीप सिहाग यांनी सांगितले, ‘अंतिम आधीपासूनच खूप ऊर्जावान आहे. तिने राष्ट्रकुल ट्रायलमध्ये विनेश फोगाटसारख्या मल्लालाही चकित केले होते.’