नाशिक : नाशिकच्या अंबड लिंक रोडवरील मीना ट्रेडर्स या भंगार गोदामाला आज सकाळी साडेनऊ वाजेच्या सुमारास भीषण आग लागली होती. जवळपास तीन तासांच्या अथक प्रयत्नानंतर ही आटोक्यात आणण्यात यश आले असले तरी आग कोणत्या कारणाने लागली हे अद्याप स्पष्ट झालेले नाही. या घटनेत कुठलीही जीवितहानी झालेली नसली तरी मात्र लाखोंचा माल जळून खाक झाल्याचा अंदाज व्यक्त केला जातो आहे.
नाशिकच्या सातपूर परिसरातील अंबड लिंकरोड आगीची घटना घडली. येथील ज्वलनशील पदार्थ साठवलेल्या गोडावुनला आज सकाळच्या सुमारास आग लागली. यात सुदैवाने जीवितहानी झाली नाही. हे गोदाम प्लास्टिकचे असल्याने आग मोठ्या प्रमाणावर भडकली होती. तसेच धुराचे लोटच्या लोट बाहेर पडत होते. महापालिका अग्निशमन विभाग आणि एमआयडीसीच्या बंबांनी काही वेळातच ही आग आटोक्यात आणली.
अंबड लिंक रोडवरील शाबू मकबल अहमद खान यांनी आझाद नगर भागात भाड्याने गोडाऊन घेतले आहे. या ठिकाणी ज्वलनशील साहित्यासाठी गोडाऊन तयार केले होते. आज सकाळी या ठिकाणी आग लागली. काही वेळातच आगीने रौद्ररूप धारण केले. त्यामध्ये गोडावूनमधील फोमसह इतर साहित्य जळून खाक झाले. आगीवर नियंत्रण मिळवण्यासाठी अग्निशामन दलाला घटनेची माहिती देण्यात आली. काही वेळातच अग्निशमन दल घटनास्थळी दाखल झाले. मात्र आगीची भीषणता अधिक असल्याने जवळपास तीन तासानंतर आग आटोक्यात आली.
दरम्यान आगीच्या घटनेची माहिती मिळताच शहरातील सातपूर, अंबड, एमआयडीसी, मुख्यालयाचे एकूण पाच बंब घटनास्थळी दाखल होत त्यांनी आगीवर नियंत्रण मिळवले. यावेळी केंद्रप्रमुख प्रदीप परदेशी, संजय लोंढे आदीं अग्निशामन दलाच्या कर्मचाऱ्यांनी विशेष मेहनत घेत आग आटोक्यात आणली. मात्र आगीचे कारण अस्पष्ट असून एक महिन्यातच या गोदामाला दुसर्यांदा आग लागल्याने संबंधित घटनेची पोलिसांकडून चौकशी करण्यात यावी अशी मागणी अग्निशमन विभागाकडून करण्यात येते आहे.