खासदार गावितांसह पालघर जिल्हा परिषद सदस्य, नगरसेवक, पदाधिकारी शिंदे गटात

पालघर : शिवसेना नेते एकनाथ शिंदे आणि ४० आमदारांनी बंडखोरी केल्यानंतर आता शुक्रवारी रात्री, पालघर जिल्ह्यातील शिवसेनेचे पदाधिकारी, नगरसेवक, जिल्हा परिषद सदस्यांनी शिंदे गटाला पाठिंबा दर्शवला. यावेळी खासदार राजेंद्र गावित यांच्यासह आमदार श्रीनिवास वनगादेखील उपस्थित होते. शिवसेनेला हा मोठा धक्का आहे.

आमदार श्रीनिवास यांच्या सोबत काल रात्री उशिरा पालघरचे शिवसेना खासदार राजेंद्र गावित, पालघर जिल्हा प्रमुख राजेश शहा, जिल्हा परिषद सदस्य प्रकाश निकम, सारिका निकम, मोखाडा तालुका प्रमुख अमोल पाटील यासह जव्हार, मोखाडा, विक्रमगड, तलासरी नगरपरिषदचे सर्व नगरसेवक, पालघर जिल्हा परिषदेचे सहा सदस्य, जिल्ह्यातील प्रमुख कार्यकर्ते, वसई तालुका प्रमुख निलेश तेंडुलकर, उपजिल्हाप्रमुख नवीन दुबे, वसई तालुका उपप्रमुख तथा माजी नगरसेविका यांचे पती दिवाकर सिंग, काही महिन्यांपूर्वी बहुजन विकास आघाडीतून शिवसेनेत दाखल झालेले वसई-विरारचे माजी स्थायी समिती सभापती सुदेश चौधरी यांच्यासह जवळपास ५० ते ६० शिवसेनेचे प्रमुख पदाधिकारी एकनाथ शिंदे गटात सामिल झाले.

जिजाऊ संघटनाही शिंदे गटासोबत

पालघर जिल्ह्यातील जिजाऊ संघटनाही शिंदे गटासोबत असल्याचे दिसून आले. या वर्षी जिजाऊ संघटनेने विक्रमगड, तलासरीसह इतर तालुक्यात निवडणूक लढवली होती. त्यात त्यांना चांगले यश मिळाले होते. जिजाऊ संघटनेचे अध्यक्ष निलेश सांबरे आणि पदाधिकारी शिंदे गटात सामिल झाले आहेत.