रांची (वृत्तसंस्था) : नुकत्याच संपलेल्या ‘आयपीएल’च्या हंगामात चेन्नईची कामगिरी विशेष नव्हती, पण या संघाचा कर्णधार महेंद्रसिंग धोनी हा मात्र कायम चर्चेत राहिला आहे. रांची विमानतळावर धोनीने एका दिव्यांग चाहतीसोबत काही वेळ घालवला आणि तिला आयुष्यातील एक खास क्षण भेट म्हणून दिला. धोनीची फॅन असलेल्या लावण्याने आता तिचा फोटो तिच्या सोशल मीडियावर शेअर केला आणि सांगितले की, या भेटीदरम्यान ती खूप भावूक झाली होती.
तेव्हा धोनीने स्वतः तिचे अश्रू पुसले आणि सांगीतले यापुढे कधीही रडू नकोस’. ‘धोनी खूप गोड आहे व त्याला भेटणे हा माझ्या आयुष्यातील सर्वात अद्भुत अनुभव आहे’, असे ती म्हणाली. धोनीसोबतच्या भेटीत लावण्या खूपच आनंदी दिसत होती.
लावण्याच्या सोशल मीडिया पोस्टनुसार, ३१ मे रोजी रांची विमानतळावर ती धोनीला भेटली होती. यादरम्यान तिने धोनीला तिचे स्केचही भेट दिले. लावण्याने आपल्या पोस्टमध्ये लिहिले ‘धोनीसोबतच्या माझ्या भेटीचे वर्णन मी शब्दात व्यक्त करू शकत नाही.’
लावण्याची इच्छा झाली पूर्ण...
जयपूर येथे राहणारी लावण्या पिलानिया ही स्पाइन मस्कुलर ॲट्रोफी या असाध्य आजाराने त्रस्त आहे. त्यामुळे लावण्या दुसऱ्या माणसाच्या मदतीशिवाय काहीही करू शकत नाही. तर या असाध्य आजारामुळे तिची हाडेही दिवसेंदिवस कमकुवत होत आहेत. त्यामुळे ती रोज जीवन-मरणाची लढाई लढत आहे. नुकतेच लावण्याने सोशल मीडियावर महेंद्रसिंग धोनीला भेटण्याची विनंती केली होती.