मुंबई (वृत्तसंस्था) : मुंबई इंडियन्स संघातून खेळणारा युवा फलंदाज तिलक वर्माने दमदार फलंदाजी करत सर्वांचे लक्ष वेधले आहे. त्याच्या या खेळीचे कौतुक महान माजी क्रिकेटपटू सुनील गावस्कर यांनी केले आहे. ‘तिलकला क्रिकेटचे योग्य ज्ञान असून तो भारतासाठी तिन्ही प्रकारच्या क्रिकेटमध्ये खेळू शकतो’, असे गावस्कर म्हणाले.
गावस्कर यांनी एका क्रीडा वाहीनीच्या शोमध्ये बोलताना तिलकचे कौतुक केले आहे. ते म्हणाले, ‘तिलक वर्माने यंदाच्या हंगामात दिलासादायक अशी कामगिरी केली आहे.’
चेन्नई सुपर किंग्ज विरुद्धच्या सामन्यात संघ अडचणीत असताना त्याने केलेली विजयी खेळी संघासाठी अत्यंत महत्त्वाची ठरली. ‘तिलक संपूर्ण मैदानात फटकेबाजी करू शकतो, स्ट्राइक रोटेट करण्याचं कसबही त्याच्यात आहे. त्यामुळे भविष्यात भारतासाठी सर्व प्रकारच्या क्रिकेटमध्ये तो एक चांगला फलंदाज होऊ शकतो’, असेही गावस्कर म्हणाले.