मुंबई (प्रतिनिधी) : कोरोनामुळे उद्भवलेली परिस्थिती आणि लावण्यात आलेली टाळेबंदी यामुळे घरून काम करावे लागत आहे. तसेच शालेय शिक्षण ऑनलाईन, कार्यशाळा, बैठका ऑनलाईन होत असल्यामुळे संगणक आणि लॅपटॉपच्या मागणीत मोठी वाढ नोंदवण्यात आली होती. मात्र २०२२ च्या पहिल्या तिमाहीत संगणक आणि लॅपटॉपची मागणी घटल्याचे दिसून येत आहे.
या काळात संगणक तसेच लॅपटॉपच्या मागणीत गेल्या वर्षीच्या तुलनेत ४.३ टक्के घट नोंदवण्यात आली. एका अहवालानुसार २०२२ च्या पहिल्या तिमाहीत ७८.७ दशलक्ष लोकांनी संगणक आणि लॅपटॉपची खरेदी केली. मात्र हा आकडा २०२१ च्या पहिल्या तिमाहीच्या तुलनेत ४.३ टक्क्यांनी कमी आहे. यंदा महागाई तसेच रशिया-युक्रेन युद्धामुळे संगणक बाजारपेठेत मंदी असल्याचे तज्ज्ञांचे म्हणणे आहे. यासोबतच चीनमध्ये कोरोनाचा प्रकोप वाढल्यामुळे अनेक शहरांमध्ये टाळेबंदी लागू करण्यात आली. याचा परिणाम संगणकांच्या निर्मितीवर झाल्यामुळेही मागणीत घट झाल्याचे तज्ज्ञ सांगत आहेत.
२०२१ च्या पहिल्या तिमाहीत लिनोव्होचे २०.१ दशलक्ष, एचपीचे १८.८ दशलक्ष, डेलचे १३.६ दशलक्ष, ऍपलचे ६.६ दशलक्ष तर अन्य कंपन्यांच्या २३.१ दशलक्ष लॅपटॉप्सची विक्री झाली होती. २०२२ च्या पहिल्या तिमाहीत हाच आकडा कमी झाल्याचे पहायला मिळाले. या काळात लिनोव्होचे १८.१ दशलक्ष, एचपीचे १५.८ दशलक्ष, डेलचे १३.८ दशलक्ष, ऍपलचे ७.१ दशलक्ष आणि अन्य कंपन्याचे २३.८ दशलक्ष एवढे लॅपटॉप्स विकले गेले.