नवी दिल्ली : देशात महागाई प्रचंड वाढली आहे. इंधनांचे दर गगनाला भिडले आहेत. आता सरकारकडून देखील महागाईचा दर जाहीर करण्यात आला असून मार्च महिन्यात हा दर सर्वाधिक असल्याचं केंद्र सरकारने सांगितलं आहे. गेल्या वर्षीच्या तुलनेत यंदा मार्च महिन्यात महागाईचा दर दुप्पट झाला आहे.
गेल्या वर्षी मार्चमध्ये वार्षिक महागाईचा दर ७.८९ टक्के होता. यंदा मार्च महिन्यात हाच दर दुप्पट झाला असून १४.५५ टक्क्यांवर पोहोचला आहे. यामागचे कारण देखील केंद्र सरकारने स्पष्ट केले आहे. रशिया-युक्रेन युद्धामुळे जागतिक पुरवठा साखळीत व्यत्यय आला. त्यामुळे कच्चे तेल, पेट्रोलियम, नैसर्गिक वायू, खनिज तेल, मूलभूत धातू इत्यादींच्या किंमती वाढल्या आहेत. मार्च २०२२ मध्ये महागाईचा दर उच्च आहे, असं केंद्र सरकारने सांगितलं आहे.
गेल्या दीड महिन्यांपासून युक्रेन-रशियामध्ये युद्ध सुरू आहे. कच्च्या तेलाचा पुरवठा करणारा रशिया सर्वात मोठा देश आहे. पण, युद्धामुळे मध्यंतरी पुरवठा साखळी खंडीत झाली होती. तसेच पाश्चात्य देशांनी रशियावर निर्बंध लादले आहेत. तसेच रशियाच्या कच्च्या तेलावर देखील बंदी घातली आहे. त्यामुळे आंतरराष्ट्रीय बाजारात कच्च्या तेलाच्या किंमती वाढल्या आहेत. त्यामुळे पेट्रोल, डिझेल, वायू यांच्या किंमती वाढल्या आहेत. पण, आंतराराष्ट्रीय बाजारात कच्च्या तेलाच्या किंमतीत प्रचंड वाढ होऊनही निवडणुकीच्या काळात भारतात पेट्रोल-डिझेलच्या किंमती स्थिर होत्या. निवडणुका संपल्यानंतर तीन-चार दिवसांनी इंधनाच्या किंमतीमध्ये हळूहळू वाढ होत गेली. राजधानी दिल्लीत एक लिटर पेट्रोलचा दर 105.41 रुपये तर प्रति लिटर डिझेलचा दर 96.67 रुपये आहे. मुंबईत पेट्रोलचा दर 120.51 रुपये आणि डिझेलचा दर 104.77 रुपये प्रतिलिटर आहे.