कल्याण (प्रतिनिधी) : कायापालट अभियानांतर्गत महापालिका परिसरातील रस्त्यांची साफसफाई करण्याबरोबरच, येऊ घातलेला पावसाळा लक्षात घेता लहान नाले व छोटी गटारे नियमित स्वरुपात साफ करुन घेणेबाबतचे निर्देश महापालिका आयुक्त डॉ. विजय सूर्यवंशी यांनी सर्व प्रभागांच्या सहा. आयुक्त यांना दिले आहेत. त्या आनुषंगाने शुक्रवार सकाळपासूनच १/अ प्रभागाचे सहा. आयुक्त सुहास गुप्ते यांनी घनकचरा व्यवस्थापन विभागाच्या मदतीने अंतर्गत नाल्यांची साफसफाई करण्यास सुरुवात केली.
त्याचप्रमाणे ३/क प्रभागातही सहा. आयुक्त सुधिर मोकल यांनी कल्याण पश्चिम परिसरात आरोग्य निरिक्षक जगन्नाथ वड्डे व इतरांच्या मदतीने संतोषी माता रोड - सहजानंद चौक - छत्रपती शिवाजी महाराज चौक - महमंद अली चौक – म. फुले चौक तसेच कल्याण स्टेशन परिसर,गावदेवी रोड, लालचौकी रोड, सुभाष नगर रोड, दुध नाका,राममारूती रोड, निक्की नगर, चौधरी मोहल्ला, आधारवाडी चौक, व मेन रोड परिसरातील साफसफाई करून घेतली आणि जोशीबाग परिसरातील ,पंचमुखी परिसरातील तसेच अन्सारी चौक येथील गटारातील गाळ काढून साफ करण्याची कारवाई घनकचरा व्यवस्थापन विभागाच्या कर्मचाऱ्यायांमार्फत करुन घेतली.