दरेकरांच्या ताफ्यातील गाड्यांना वारंवार होणाऱ्या अपघातांची चौकशी करावी

मुंबई : विधान परिषदेचे विरोधी पक्षनेते प्रविण दरेकर नुकताच सातारा, महाबळेश्वर दौऱ्यावर शासकीय वाहनांनी जाताना पुणे-बंगळुरू महामार्गावर पारगाव–खंडाळा येथे त्यांच्या ताफ्यातील वाहनांना अपघात झाला. गेल्या वर्षभराच्या काळात तीन वेळा दरेकर यांच्या ताफ्यातील वाहनांचा अपघात झाला आहे. या परिस्थितीचे गांभीर्य लक्षात घेऊन विरोधी पक्षनेते दरेकर यांच्या ताफ्यातील गाड्यांना झालेला अपघात हा घातपात तर नाही ना अशी शंका व्यक्त होण्यास वाव असल्यामुळे या प्रकरणाची विशेष तपास पथकामार्फत चौकशी करण्यात यावी, अशी मागणी आमदार रमेश पाटील यांनी मुख्यमंत्र्यांकडे केली आहे.

आमदार पाटील यांनी मुख्यमंत्री उध्दव ठाकरे यांना पाठविलेल्या पत्रानुसार, विरोधी पक्ष या नात्याने अनेक वेळा समाजातील कुप्रवृत्ती, भ्रष्टाचार, गुन्हेगारी, अन्यायाविरुद्ध संपूर्ण महाराष्ट्रभर दौरा करून स्पष्ट भूमिका मांडावी लागते. अशा परिस्थितीत घातपात होण्याची शक्यता नाकारता येत नाही. त्यामुळे यापूर्वी घडलेल्या तिन्ही अपघात तसेच कालच्या अपघाताच्या घटनेचे गांभीर्य ध्यानात घेऊन या सर्व प्रकरणांची विशेष तपास पथकांमार्फत चौकशी करण्याची तसेच विरोधी पक्षनेते दरेकर यांची सुरक्षा व्यवस्था वाढविण्याची नितांत आवश्यकता आहे. त्यामुळे याबाबत योग्य तो निर्णय घेऊन सहकार्य करण्याची विनंती पाटील यांनी केली आहे.
——————