नायलॉन मांजा विकणाऱ्या दोघांवर कारवाई

नाशिक (प्रतिनिधी) : नायलॉन मांजा विक्रीस असलेल्या मनाई आदेशाचे उल्लंघन केल्याप्रकरणी दोन ठिकाणी पोलिसांनी केलेल्या कारवाईत दोन जणांवर गुन्हे दाखल करण्यात आले आहेत.

पहिल्या घटनेत प्रथमेश प्रफुल्ल तांबोळी (रा. ओम्साई अपार्टमेंट, राठी आमराईसमोर, गंगापूर रोड) याने पोलीस आयुक्तांच्या मनाई आदेशाचे उल्लंघन करून राहत्या घराच्या बिल्डिंगच्या पार्किंगमध्ये भिंतीच्या आडोशाला नायलॉन मांजा विकत असल्याचे कळले. त्यानुसार पोलिसांनी छापा मारून नायलॉन मांजा गुंडाळलेले २८ गट्टू असा सुमारे १९ हजार ६०० रुपयांचा मांजा तांबोळी याच्याकडून जप्त केला असून, त्याच्याविरुद्ध सरकारवाडा पोलीस ठाण्यात प्रशांत मरकड यांच्या फिर्यादीनुसार गुन्हा दाखल करण्यात आला आहे, तर दुसऱ्या घटनेत नायलॉन मांजाच्या वापरावर बंदी असल्याचे माहीत असतानाही त्याची विक्री करणाऱ्या दुकानावर छापा मारण्यात आला आहे.

गौरव रमेश फरताळे (वय ३२, रा. तांबे मळा, शांतीनगर, मखमलाबाद रोड) हा घराच्या आवारात नायलॉन मांजा विक्री करीत असल्याची माहिती मिळाल्यानुसार म्हसरूळ पोलीस पथकाने या ठिकाणी छापा टाकला. त्यात मोनो पाईप कंपनीचा नायलॉन मांजा असलेले २३ गट्टू असा एकूण १६ हजार १०० रुपये किमतीचा नायलॉन मांजा जप्त करण्यात आला आहे. पोलीस नाईक नीलेश पवार यांच्या फिर्यादीनुसार म्हसरूळ पोलीस ठाण्यात गुन्हा दाखल करण्यात आला असून, पुढील तपास पोलीस हवालदार हळदे करीत आहेत.