नाशिक: नाशिक येथील राज्य परिवहन महामंडळाच्या कर्मचाऱ्यांचा संप मिटलेला नाही. संपकरी कर्मचारी हे आपल्या मागण्यायवर अडून बसले आहेत. त्यामुळे नाशिकमध्ये राज्य परिवहन कर्मचाऱ्यांचा संप सुरूच आहे, असे कर्मचारी संघटनेच्यावतीने स्पष्ट करण्यात आले आहे. परिवहनमंत्री अनिल परब आणि शरद पवार यांच्यासह एसटी कर्मचाऱ्यांच्या विविध संघटनांनी पत्रकार परिषद घेऊन संप मागे घेत असल्याचे जाहीर केले.
तसेच कर्मचाऱ्यांना कामावर परतण्याचे आवाहन केले. असे असतांना मात्र नाहीकमधील एसटी कर्मचारी संपावर ठाम असून विलनीकरणाची प्रमुख मागणी पूर्ण होईपर्यंत संप सुरूच राहणार असल्याची भूमिका त्यांनी स्पष्ट केली आहे.नाशिक येथील कर्मचाऱ्यांशी संवाद साधला असता ते म्हणाले की, ‘आज बैठकीत समील झालेल्या २२ संघटनांशी आमचा संबंध नाही. आमचा दुखवटा आंदोलन सुरूच राहणार असून विलनीकरण होईपर्यंत संप सुरूच राहणार आहे. त्यामुळे पुन्हा एकदा एका यशस्वी बैठकीनंतरही नाशिक मधील कर्मचारी आपल्या भूमिकेवर ठाम असल्याने विलीनीकरणाचा तिढा कायम राहिला आहे.