चंदीगड : लुधियाना जिल्हा न्यायालय परिसरात स्फोट (explosion in ludhiana) झाला आहे. या स्फोटात २ जण ठार तर ४ जण जखमी झाले आहेत. वकिलांच्या संपामुळे न्यायालय परिसरात गर्दी नव्हती. त्यामुळे मोठी हानी टाळता आली. पण स्फोटात न्यायालयाच्या इमारतीचीही मोठी हानी झाली आहे. या स्फोटातील जखमींना तातडीने रुग्णालयात दाखल करण्यात आले आहे.
लुधियाना जिल्हा न्यायालयाच्या आवारात दुसऱ्या मजल्यावर हा स्फोट झाला. या घटनेतील दोषींना सोडणार नाही, असे मुख्यमंत्री चरणजीत सिंग चन्नी यांनी म्हटले आहे.
स्फोट इतका जोरदार होता की आजूबाजूच्या इमारतींच्या काचा फुटल्या. हा घातपात होता का? याला अद्याप दुजोरा मिळालेला नाही. हा स्फोट कोणी आणि का केला, याची माहिती मिळालेली नाही.
हा स्फोट सिलिंडरमुळे झाला की आणखी कशामुळे, हे अद्याप समजू शकलेले नाही. प्रशासनाने प्राथमिक तपास सुरू केला आहे. ही घटना घडली तेव्हा न्यायालयाच्या आवारात मोठ्या संख्येने लोक उपस्थित होते. लुधियानाच्या जुन्या कोर्ट कॉम्प्लेक्समध्ये हा स्फोट झाला. हा स्फोट कटाचा एक भाग असल्याचे बोलले जात आहे.
आम्ही तपास करत आहोत. या स्फोटात दोन जणांचा मृत्यू झाला असून चार जण जखमी झाले आहेत. आम्ही फॉरेन्सिक टीमला पाचारण केले आहे, असे लुधियानाचे पोलीस आयुक्त गुरप्रीत सिंग भुल्लर यांनी सांगितले.