भिवंडी (वार्ताहर) : भिवंडी परिमंडळ दोनमध्ये चोरट्यांनी एकाच रात्री कोनगावातील डझनभर दुकाने फोडल्याची घटना समोर आली आहे. या घटनेमुळे व्यापाऱ्यांसह नागरिकांमध्ये भीतीचे वातावरण पसरले आहे.
भिवंडी परिमंडळ दोनमध्ये मोठ्या प्रमाणात गुन्हेगारी, घरफोड्या, चोऱ्यामाऱ्याच्या घटनांत वाढ झाल्याचे पोलीस ठाण्यात केलेल्या नोंदीवरून दिसून येते. त्यातच भिवंडी पोलीस परिमंडळ दोनच्या हद्दीतील कोनगाव पोलीस ठाण्याच्या हद्दीत कल्याण भिवंडी मार्गावरील कोन नाक्यावर व गावातील दुकानांना चोरट्यांनी लक्ष करीत नुकतेच एका रात्रीत डझनभर दुकाने फोडली. यामध्ये ५ मेडिकल २ स्वीट मार्ट (मिठाईची दुकाने) आणि २ इतर दुकानांचा समावेश आहे. तर तीन दुकानांचे शटर उचकटत असताना आवाज झाल्याने चोरट्यांनी पळ काढला होता.