नवी दिल्ली : देशात ओमायक्रॉन या कोरोनाच्या नवीन प्रकाराची लागण होण्याच्या रुग्णांमध्ये झपाट्याने वाढ होत आहे. कोरोना विषाणूचे ओमायक्रॉन हे धोकादायक रूप आता ११ राज्यांमध्ये पसरले आहे. बुधवारी ओमायक्रॉनचे नवीन रुग्ण केरळमध्ये चार, महाराष्ट्रात चार, तेलंगणात दोन आणि पश्चिम बंगाल आणि तामिळनाडूमध्ये प्रत्येकी एक अशा एकूण १२ रुग्णांची एका दिवसात पुष्टी झाली आहे. त्याचवेळी दिल्लीत आज आणखी चार रुग्ण आढळले आहेत. यासह, देशातील एकूण संक्रमित लोकांची संख्या ७७ वर पोहोचली आहे.
दिल्लीत ओमिक्रॉनच्या रुग्णांची एकूण संख्या १० झाली आहे. या १० रुग्णांपैकी एकाला डिस्चार्ज देण्यात आला असून नऊजण अजूनही एलएनजेपी रुग्णालयात उपचार घेत असल्याचे दिल्लीचे आरोग्य मंत्री सत्येंद्र जैन यांनी सांगितले.
दरम्यान, महाराष्ट्रात ओमायक्रॉनचे सर्वाधिक आतापर्यंत एकूण ३२ रुग्ण आढळून आले आहेत. राजस्थान १७ रुग्णांसह दुसऱ्या स्थानावर आहे. याशिवाय गुजरात (४), कर्नाटक (३), केरळ (५), आंध्र प्रदेश (१), तेलंगणा (२), पश्चिम बंगाल (१), चंदीगड (१), तामिळनाडू (१) यांचा समावेश आहे.